THILṬHA TUAHTU DING KAN SI

IN by No Comments


Galati 6:1-10

                        May 22, 2017 ah, Ariana Grande in England ramsung ih Manchester khua ah concert a tuah. A ṭheh zawngah misual pakhat in bomb puakterin mi 22 an thi ih mi 119 lai hliamhma tuarin an um. Thuthang ih an suahmi pawl ahcun zo si bomb puahtu, zo pawl si mithi, zo pawlin hliam an tuar timi lawnglawng a si. Cumi pawl lakah thuthang latu pawlih a thu an theihcak zetmi pakhat a um.

                        Inn le lo nei lo ih khawlak ih riak men tu kum 35 mi Stephen Jones cu bomb puahnak kiangah a um ve. Bomb puah thawm a theih hnu ah a concet tuahnak hmunah feh ve in hliam a tuartu pawl cu a theitawkin a tuamhlawm. Thusuhnak an tuah tikah, "Thi le hnai thawn a ummi pawl ka hmuh tikah bawm lo in ka um thei lo, kei khal minung ka si ih annih khal minung an si. Midang ka bawm theinak zawnin ka bawm ve. Inn le lo ka nei lo nan thinlung neitu ka si ve" tiin a sim.

                        A thuhla rak theitu pawlin a thilṭha tuahman ah tiin online ihsin sumpai an hawlsak ih tawkfang a ngah. Cui thuhla a rak theitu lakah West Ham Football Club neitu David Sullivan le a fapa khal an tel. Annih in thlaruk hrang inn sansak dingin Stephen Jones cu thu an tiam ih hmundang ihsin hnaṭuan rak kotu khal an um. Midang hrang a ṭuanmi cu a hrangah thlawsuah sangka a si.

                        Zumtu pawl khal thilṭha tuah dingih rundam kan si (Efesa 2:10). Thilṭha kan tuah dingmi ah kan zumtu pi pawl hnenah a si thei ih (Galati 6:10) midang hnen khalah a si thei. Midang ih ṭulmi pawl bawmtu ding kan si rualin, zumtu in thilṭha kan tuah dingmi lakih thupi bik cu rundamnak thuthangṭha sim hi a si. Pathian in kan simmi hmangin hna a ṭuan thei ih miin kumkhaw nunnak an co theinak lamzin khal a si fawn. Khawi hmun le ram, ziangtik can khalah thilṭha kan tuah theizat in tuah uhsi.



"Thilṭha tuah dingih rundam kan si"

Jesui' Damtermi

IN by No Comments



Luke 8 : 1 – 3; 24:10

Leitlun milai zaten Pathian hmai ah hmahnai khat kan si ih, thianghlim lo kan si ( Isaiah 1:5-6 ). Pathian hmai ih kan dinhmun cu a sezetmi a si ih, laktlak umlomi a si. A thianghlimmi Pathian thawn kan umtlang theinak ding ahcun hmahnaikhat kan sinak ihsin damtertu kan ṭul. Mahte ih damter aw thei lo milai, mahte rundam aw thei lo milai kan si ruangah Rundamnak Maksak cu Jesuh Khrih ah Pathian in in tuahsak. Jesuh Khrih tuahciami kan zumnak cu, Pathian in kan damnak ah in cohlansak ruangah, van khua le timi si theinak khal kan nei hngal a si.


Pathian hmai ih midam kan sinak hi kanmai’ tuah, ṭuan le thilti pakhat hman a tel lo ih, zangfahnak in Jesuh Khrih ah damtermi kan si. Jesui tuarnak cu kan hrang kumkhaw daih Pathian hmai ih kan damnak a si ( Isaiah 53:5 ). Pathian hmai ah mawh nei lo ih in tuahtu, mi thianghlim ih in tuahtu, mi tling le thiamco ih in tuahtu cu Jesuh Khrih a si. Jesuh Khrih ah kannih cu Pathian in in hmu ih, Jesui’ sinak cu kan sinak ah Pathian in a phuang a si ( 1 Korin 1:30 ). Pathian hmai ah damter kan sinak cu Jesui’ tuarnak a si ruangah, zohman in mina in ti thei nawn lo.


Jesui’ tidamnak a cotu pawl cun tidamtu Jesui’ hrang an nun an hlan ngam. Joanna cu Jesui damtermi a si hnu ah, Jesuh Khrih leitlun ih hna a ṭuanlai ah bawmtu a si ih, a thawhsalnak khal phuangtu ah a rung cang. Rundamnak a cotu zumtu kan nunnak ah, tidamtu Pathian hrang nung ding kan si tihi kan theih ding a thupi zet. Pathian in kumkhaw daih in damter zo ih ruangah, in damtertu Pathian hrang ṭuan hi kan tuah ding hrimhrim a si. Pathian in kanmah le tithei zawng a theihfiang tuk ruangah, kan ṭuan thei dingmi ṭuanvo in pe ciar. Jesui’ in damternak thei in, damtertu Jesui’ hrangah theitawkin ṭuan sinsin uhsi.


“Damnak a cotu zumtu pawlin, Damtertu Pathian hrang mah le tlintawk ih ṭuan ding hi kan ṭuanvo le ti ding hrimhrim a si”


Umnak Ding Hmun Ih Um Le Um Lo

IN by No Comments



Luke 15 : 11 – 27

Fapa tlanhlo pa cun a umnak ding hmun diktak a simi a pai’ inn ih a umlai ahcun nuamzet in, ziangdang ngai lo in a um. A pai’ lennak cu amai’ ta vek a si ve ruangah, nuam in a um. Asinan, a ro pawl dil tahrat in hmundang ah a va feh ih, a umlonak ding hmun ih a fehsuak tik ahcun harsatnak in a nunnak cu a thlun hngal. Reilote cu nuamzetin a um nan, rei a daih lo. A umlonak ding hmun ih a um ruangih harsatnak a tuar tikah, a umnak ding hmun diktak a theifiang ih, a pai’ hnenah a kirsal tik ahcun a pa cun lungawiten a rak a cohlang.


Zumtu pawl hi leitlun ah kan um nan leitlun ta kan si lo ih leitlunmi khal kan si nawn lo. Jesuh Khrih zarah vancung rammi kan si zo. Leitlun ih a umlai mi kan si tikah, Pathian fate pawl hin kan umnak hi kan ralrin ringring a thupi ngaingai ih, kan umnak ding hmun diktak ih um ding khal kan si fawn. Pathian Thu le hla umnak hmun, Pathian hnaṭuannak hmun ih kan um a thupi. Cun, kanmah rori khalin can hleice ruatin Pathian Thu thawi um ding kan si. Zumtui’ umnak ding hmun cu Pathian Thu le hla umnak hmun a si ding hi a thupi ngaingai.


Kan umlonak ding hmun ih kan um tik ahcun kan hlawhsam, harsa kan ti, kan buai, diremnak a um lo ih, kan umnak ding hmun kan ngai ṭheu. Pathian thawi can kan hmantlang lo tik ahcun kan thlarau nun khal a ro, a cau thei a si. Kan umlonak ding hmun ih kan um ti kan theihawk veten sirawknak thawn Pathian hnenah kirsal ding kan si. Sirawknak thawn Pathian kan pansal tikah, anih cun kan sualnak pawl ngaidam dingin in rak hngak ringring ih, kan sualnak pawl ngaidam in Amah thawn kan pehtlaihawknak khal a hnget sinsin ding. Pathian thawn can hmangtlang in kan umnak ding hmun ih kan um a si ahcun, kan nunnak fehtlangin Pathian in hna a ṭuansuak ding a si.


“leitlun ah zumtu pawl umnak ding cu Pathian Thu le hla umnak hmun a si”


Zumtu A Thih Veten Khawi Ah A Feh ?

IN by No Comments



(Luke 43 : 23 ; Att. 7:55-60; 2 Korin 5: 8 ; Filipi 1:21)


Thuhmaihruai

Zumtu a thih tikah khawitawk ah a feh ding timi hi thusuhnak um ringring mi a si. Bible sung kan zoh tikah, zumtu a thih veten vanram a feh timi Bible cang ti fukfi in kan hmu lo nan, Jesuh Khrih ṭongkam, Paul ih ṭongkam le Stephen ih ṭongkam pawl ihsin Pathian hnen an thleng timi cu kan hmufiang thei. Paul cun, “Lei taksa ih ka umlai ahcun Bawipai’ hnenah kan um lo ( 2 Korin 5:6 ) tiin a sim ṭheh hnu ah, “Taksa ah um loin Bawipai’ hnen ih um cu kan duhsawn ( 2 Korin 5:8 )” tiin a sim peh. Bawipai’ hnen ( The Presence of God ) cu khawitawk a si ding? Pathian cu Vanram / Vancung ah a um ( Saam 11:4 ; 115:3 ; Isaiah 66:1 ; Att. 7:56 ; Hebru 8:1; Thup. 4;2 ). Pathian hnen ih feh / um timi cu Vanram ih um ti thawn ṭongkam bangaw a si. Curuangah, zumtu a thih tikah, Pathian hnenah ( Vanram ah ) a feh ti hi Bible ih in zirhmi a si.

1.     JESUH KHRIH  IH  ṬONGKAM ( Luke 43 : 23 ).

Thinglamtah parih Jesuh Khrih an thah ṭum ahkhan, Jesuh Khrih kiang ih an khen thatmi pai’ hnenah Jesuh cun, “Tuihsun ah keimah thawn Paradis ah na um ding” tiin a sim. Paradis timi ṭongfang hi Bible ih a hmanah vanram thawn hmunkhat in a hmang ( Luke 23: 43 ; Thup. 2:7 ; 2 Korin 12:4). Jesuh Khrih cu Pathian a si ih, leitlun ih rundamnak hnaṭuan a ṭheh veten Paradise / vanram ah a feh hngal ih, cutawk ah tu khalah kan hrang Puithiam a ṭuan rero ( Hebru 4:14 - 15; 7:24-25). Vanram cu Pathian umnak a si ih, Jesuh Khrih kiangih misual an thahmi pa cun Jesuh Khrih a zum ruangah a hnenah (The Presence of God ) / vanram / paradis ah a um ve ding. Zumtu a thih tikah, Pathian hnenah a um ih, Pathian umnak cu vanram a si.

2.     STEPHEN  IH  HMUHMI ( Att. 7:56 – 60 ).

Kawhhran Upa a simi Stephen cu Pathian Thu a simnak ruangah kaih a si ih, lung ih den that tuartu a si. Lung ih an den rero lai, a thih hlante ahcun, vancung sangka ongaw in Pathian vorhlam kap ih Jesuh Khrih a hmuh thu a sim. Cun, Stephen cun, “Bawipa Jesuh, ka thlarau cohlang aw” tiin a sim bet. Stephen cun vanram ah, Jesuh Khrih hnenah a feh ding ti kha fiangte in a hmucia. Stephen ih ṭongkam hi Paul in, “Taksa ih kan um sung cu Pathian hnenah kan um lo…… Taksa ah um loin Bawipai’ hnen ih um cu kan duhsawn” tiin 2 Korin 5:6 – 8 nak ih a simmi thawn thuhmun a si. Zumtu cu a nunnak thuh ih a umnak Jesuh Khrih ( Kol. 3:1-3 ) hnenah a feh ding ti cu a fiang ih, Jesui’ umnak cu Vanram a si.

3.     PAUL  IH  ṬONGKAM ( 2 Korin 5: 8; Filipi 1:21-23 ).

Paul cun lei taksa a um sung cu Pathian umnak vanram ah a um lo ti a theifiang aw ih, cun, a lei taksa nunnak a cem tik ahcun vanram ah a feh hngal ding ti a simfiang fawn. Paul cun, “Thil pahnih lakah awlawksawng in ka um, fehsuak ih Khrih thawi um duhnak ka nei.. ( Filipi 1:23 )” tiin a sim. Khrih thawi um, Khrih hnen ih um timi cun, “Jesuh Khrih umnak vanram ih um ve” timi a sim duhnak a si ruangah, taksa in a thih tikah, vanram ah a feh hngal ding timi kha Paul cun a sim duh. Lei taksa nunnak a cem in kan thlarau cu Jesuh Khrih ah vancung rammi sinak neitu kan si ( Filipi 3:20 ) zo ruangah, kan ram a simi vancung ram / vanram ah kan fehhngal ding ti a sim duh. 

Thunetnak

Pathian hmai ih misual a simi milai pawl cu, Pathian duhdawtnak cun Jesuh Khrih ah in hawlsuaksal zo. Jesuh Khrih kan zumnak thawngin Pathian thawn pehtlaihawknak neisal in, Pathian fate si theinak khal kan nei. Pathian fate a simi pawl cu camsiatnak leitlun ah kan lenglai. Leitlun kan nunnak a cem tikah, kan thlarau cu in Rundamtu Pathian hnenah a feh ti hi Bible ih in simmi a si. Pathian umnak cu vanram a si ruangah, Pathian hnenih UM le FEH timi ṭongkam cun, Pathian umnak vanram ah kan fehhngal ti a langter duh a si.


Sources ( Sirhsanmi Pawl )

1.     Falam Baibal Thianghlim ( Rev. Hre Kio ).

2.     Thuthlung Thar ( Rev. Timothy Sui Lian Mang ).

3.     Systematic Theology ( Charles C. Ryrie ).

4.     The Moody Handbook of Theology ( Paul Enns ).

5.     Matthew Henry Bible Commentary.

6.      www.gotquestion.org

7.     www.bible.org



Jeim Ih Thucah Pathum

IN by No Comments





( Jeim 1:19 )

Jeim in zumtu pawl hnen ih ca a kuat tikah zumnak le tuahnak hi a sim uar bikmi a si. Zumtu kan si cun Pathian fate kan sinak cu kan nunnak rori in langsuak seh timi kha Jeim ih sim duhmi a si. Jeim in thucah tamzet a nei ih, cumi lak ihsin 1:19 ih thucah a neihmi hmangin thazang latlang uhsi.

1.     Thu Theihnak Ah Zamrang Uh.

 Jeim cun, “Thu theih duhnak lam ahcun zamrang mi si uh” tiin zumtu pawl in sawmnak kan hmu thei. Pathian in rundamnak in tuahsakmi khal A Thu kan theihnak ihsin rami a si ( Rom 10:17 ). Rundamnak lawng si lo in, Khristian nu ke kan karnak ding hrang khal Pathian Thu kan ngai le theihnak ihsin Thlarau Thianghlim in hna a ṭuan. Curuangah, Pathian Thu theihnak lam ahcun zumtu pawl cu tlanzuamaw ding kan si. Nunpi dingmi cu theihnak ihsin a rat ruangah, ziangha ka hrang ṭha le ṭha lo, ziangha ka thlun ding ih ziangha ka hrial ding, ziang ka tuah ding ih ziang ka tuah lo ding timi pawl kan hmuhfiang theinak dingah, Pathian Thu theihnak lam ah kan hna hi hmang sinsin ding kan si.


2.     Ṭong Ahcun Khulfung Uh.

Thu theihnak lam ahcun zamrang ding in fial nan, ṭong lam ahcun ṭong hluahhlo men lo dingin in sawm. Mifim pawlin an simmi cu, “Theihnak ah hna pahnih kan nei ih, ṭongnak ah ka pakhat kan nei” an rak ti. Ralring lo le duhdahzet ih kan ṭongsuakmi khin mi hrang ṭhathnemnak a suahpi lo ṭheu. Curuangah thufim cun, “Tam deuh na ṭong le tam deuh na sual ding. Mifim na si ahcun na ṭong supaw ( Thufim 10;19 )”, “Mifim pawl cun tam tuk an ṭong lem lo ( Thufim 17:27 )” tiin a sim. Ka ṭongmi hi a dikmi a si maw ti ruat phah in, ralring tei kan ṭngsuak ding hi a thupi. Ṭong lam ih kan khulfun-lonak ding lamzin pakhat lawng te cu – Rundamnak Thuthangṭha lawngte cu zamrang zetin sim ṭulmi hnenah sim aw.


3.     Thinhengnak Ahcun Khulfung Uh.

Thufim 14:29 ahcun, “Thinsaumi cu mifim a si” tiin in sim. Pathian Thu ih duhlomi lakah thinhengnak hi a tel ve(Efesa 4:26 ; Col. 3;8 ). Peter cu a thinheng rang tuk ruangah ṭul lo in mi hna a sat. Leitlun thufim pakhat ahcun, “Na thinheng zawngah - himi hi thinhengnak a tlak maw, ti le, ka thinhengnak hin thilṭha a suahpi maw” tihi ruat aw a ti. Kan thinhengnak cun thilṭha a suahpi dah lo. Huatawknak, sualawknak, ralawknak le ngaihawk-lonak a suahpi sawn ṭheu. Curuangah, tangdornak thinlung neitu Jesuh Khrih ih lungput cu cawngin, zumtu in tangdornak thinlung kan neih ding hi Pathian in a duhmi a si ( Filipi 2:5 ).


“Zumtu cu Pathian Thu theihnak ah zamrang in, ṭong le thinhengnak ah khulfung ding kan si”


Pathian Hmin Sunlawihtu Ding Kan Si

IN by No Comments



1 Korin 10:31


Zumtu pawl kan nunnak ih Pathian duhbikmi cu, Jesuh Khrih bangnak ih ṭhanlen pitlin ding hi a si. Jesuh Khrih bangnak ih kan ṭhanglian a si ahcun, Jesui’ duhmi kan duh deuhdeuh ding ih, A huatmi khal kan hua deuhdeuh ding. Cun, leitlun kan nun damsung ah kanmah le tlintawk ih Pathian hmin kan sunlawih ter thei ding. Leitlun ih milar tamzet lak khalah, zumtu a simi pawl cun an mah le lamzin ciarin Pathian hmin an sunlawih. Bawhlung lektu lakah, Brazil rammi Kaka, Neymar, David Luis, Thiago Silva pawl tla cun an leknak hmun ihsin Pathian hmin an sunlawih. Boxing thong hminthang Manny Pacquiao khalin a leknak ah Pathian hmin a sunlawi ih, NBA lektu Jeremy Lin khalin a leknak ihsin Pathian hmin a sunlawi. Annih lo khal midang hmuh ding an um.

Pathian in thiamhleicenak in pe ciar ih, cui kan thiamnak hmangih kan tuah le kan ṭuannak lamzin ihsin Pathian hmin sunlawihnak hi kan langter thei a si. Ziangkim kan tuahmi hi Pathian ruangah, Pathian thlawsuah a si ti hi kan theihthiam a thupi zet. Cun, zumtu kan si veten bulpak ciar kan nunnak ah Thlarau Laksawng khal in pe ṭheh ih, cui kan comi ih zirin Pathian hnaṭuan ih Pathian hmin sunlawihnak petu ding kan si ( Rom 12:6-8;1 Kor. 12:8-10; Efesa 4:10; 1 Peter 4:11). Kan comi ciar hmangkhawm ih Pathian hna ṭuantlang dingin taksa pumkhat ih retmi khal kan si fawn ( 1 Kor.12:27 ).

Pathian hmin kan sunlawihnak ding hi kan inn, biakinn le mi ih in hmuhnak hmun lawng hi a si lo. Khawitawk hmun kan thlen khalah Pathian hmin sunlawih tertu ding kan si. Pathian cu khawitawk hmun khalih um Pathian ( Saam 139 ) a si ruangah, khawitawk hmun kan fehnak khalah Pathian cu a um ti theifiang in le, kan sung rori ah Pathian Thlarau Thianghlim cu kan nei ( Efesa 1:13 ) ti theifiang in, khawitawk hmun khalah Pathian duhdan ih nungin Pathian hmin sunlawih tertu ding kan si. Ṭuan theimi, duhmi, cahnak bangaw lo ih sersiammi kan si ruangah, kan hnaṭuan dan ciar a bangaw lo ding nan, kanmah le ṭuannak zawn ihsin Pathian sunlawihnak langtertu ding ih sersiammi zumtu kan si.


“Kan nunnak neitu Pathian sunlawihter hi zumtu ih ṭuanvo a si”

Bawipa Lawng Hi

IN by No Comments



Hebru 13:6

Ṭumkhat cu ka motor awn a dik lo in ka thei ih, kei in zianghman ka tuah thiam lo tikah motor tuahnak hmun ahcun ka feh. Motor tuahnak hmun ka thlen in a tuahtu pawl hnenah ka motor umdan cu ka sim hai. Annih cun an zohfiang ih, hmakhatte ah ka motor cu ziang a cang ti an theifiang hngal ih, tual ṭulmi pawl in simfiang. Tuah ṭulmi pawl in tuahsak hnu ah ka motor cu a kelte in a ṭha sal ih, thinlung nuam zetin inn lamah ka tlung. Ka motor a dik lo ti ka thei nan ka tuah thiam lo ih, a tuahthiam pawl ka fial. A tuahthiam pawl hnenih ka fehpi ih an rak tuah hnu lawngah motor cu a si dan ding vekin a um.

Zumtu pawl kan nunnak ah, kan thinhar can, kan beidong can, kan riahsiat can le kan nunah famkimlonak a um ih kan theih tikah, kan pan ding mi cu Pathian lawnglawng a si. Pathian lawng hi kan hrangah beunak ṭhabik a si ih, Amah hnen ih fehtu zohman a khir dah kel lo ( Saam 46 : 1 ). Harsatnak kan tuar can le phurrit kan phurh can khalah, A hnen ih feh dingin Pathian cun in sawm ih, kan phurrit in sawng ding khalin thu in tiam a si ( Matt. 11:28 - 30 ). Kan donharnak le kan mangbang vansannak pawl khal Pathian in A hnenih ret in fial ih, Anih cu kan zawn in ruattu a si ruangah kan donharnak pawl ihsin in luatter thei a si ( 1 Peter 5:7 ).

Harsatnak le mangbangnak kan ton can ih Pathian kan pan tikah, Pathian ih thu in tiammi cu kan harsatnak le mangbangnak sawng ding hi a si. Pathian in kan phurrit in sawnnak ahhin, leilam thilri thawn thlawsuah tahrat ih kan phurrit sawn in tum lo. Cuhnak in, leitlun cu harsatnak ram a si ruangah, van ih kan dinhmun ding khi in hmuhfiangter ih, sunglam nun hnangamnak, lungdaihnak le thinnomnak thawn in thlawsuah sawn a si ( Filipi 4:5 – 7 ). Pathian ih thlawsuahnak ih tumtahmi cu, lei thlawsuah ngah si lo in vanlam thlawsuah ngah sawn hi a si. Van ih kan sunlawinak ding ruahsan ih, lungawi le hnangam zetih lei ih kan tlanlen hi Pathian thlawsuah sunglawi a si ( Filipi 4:10 – 13 ).



“Bawipa a kotu pawl nunnak ah, lungawinak, daihnak le hnangamnak thawn Pathian in a thlawsuah ringring”

Kum 10 Sungah Khristian Mi 900,000 Thah An Si

IN by No Comments




US ramsung, Massachusetts ramṭhen ih a ummi, Gordon-Conwell Theological Seminary in Khristian pawl tuarnak thuhla a zingzoi tikah, a liamciami kum 10 sungah Khristian mi 900,000 thah an si thu an tarlang. Kumtin Khristian martyr pawl ih cazin an suahnak ahcun, 2016 sungah mi 90,000 pawl cun thah an tuar thu khal an tarlang bet a si.


Leilung tlun hmun dangdang ah, Khristian pawl hi minute 6 ah mi pakhat an that vivo tluk a si ih, thla tin Khristian mi 322 pawl cu an zumnak ruangah thah an si. Kumtin Khristian pawl an thahmi lak ihsin zatek 70 cu Africa ram ah a si ih, Khristian pawl dodaltu pawl kut ih thi an si. A dang zatek 30 pawl cu leitlun hmun dangdang ih tuar pawl an si.


Kumtin Khristian Biakinn 1329 cu siatsuah an si thu khal an tarlang. Khristian ti duhdahnak 2017 ih an tarlangmi ahcun, North Korea cu kum 6 sung a sangbik ah a um ih, Kawlram cu 28 nak ah a um ve ih, ram hnen India cu 15 nak ah a um ve.

Open Doors in Nov. 1, 2015, - Oct. 31, 2016 karlak ih Khristian ti duhdahnak le thah tuar tamnak bik ram a tarlangmi pawl tla cu :

1.    North Korea - Score: 92/100
2.    Somalia - Score: 91/100
3.    Afghanistan -Score: 89/100
4.    Pakistan -Score: 88/100
5.    Sudan -Score: 87/100
6.    Syria -Score: 86/100
7.    Iraq -Score: 86/100
8.    Iran -Score: 85/100
9.    Yemen -Score: 85/100
10.                       Eritrea -Score: 82/100
11.                       Libya -Score: 78/100
12.                       Nigeria- Score: 78/100
13.                       Maldives- Score: 76/100
14.                       Saudi Arabia -Score: 76/100
15.                       India -Score: 73/100
16.                       Uzbekistan-Score: 71/100
17.                       Vietnam -Score: 71/100
18.                       Kenya -Score: 68/100
19.                       Turkmenistan- Score: 67/100
20.                       Qatar- Score: 66/100
21.                       Egypt -Score: 65/100
22.                       Ethiopia -Score: 64/100
23.                       Palestinian Territories -Score: 64/100
24.                       Laos -Score: 64/100
25.                       Brunei -Score: 64/100
26.                       Bangladesh- Score: 63/100
27.                       Jordan -Score: 63/100
28.                       Myanmar -Score: 62/100
29.                       Tunisia -Score: 61/100
30.                       Bhutan -Score: 61/100
31.                       Malaysia -Score: 60/100
32.                       Mali -Score: 59/100
33.                       Tanzania- Score: 59/100
34.                       Central African Republic -Score: 58/100
35.                       Tajikistan -Score: 58/100
36.                       Algeria -Score: 58/100
37.                       Turkey -Score: 57/100
38.                       Kuwait -Score: 57/100
39.                       China -Score: 57/100
40.                       Djibouti -Score: 57/100
41.                       Mexico- Score: 57/100
42.                       Comoros -Score: 56/100
43.                       Kazakhstan -Score: 56/100
44.                       United Arab Emirates -Score: 55/100
45.                       Sri Lanka -Score: 55/100
46.                       Indonesia -Score: 55/100
47.                       Mauritania- Score: 55/100
48.                       Bahrain -Score: 54/100
49.                       Oman -Score: 53/100

50.                       Colombia -Score: 53/100