A
SUNGLAWIMI JESUH
KHRIH THISEN
Tluksiatnak ruangah nunau hrin milai
hmuahhmuah cu Pathian hmaiah covo tha le dinhmun tha nei thei nawn lo kan si.
Ziangtluk in kan tha, kan fel, kan tuan ih kan pe a si hmanah, cui kan
tuahthatnak cun Pathian hmai ih kan dinhmun cu in thleng danglam thei cuang lo.
Leitlun ih um milai zaten, mifel le fel lo, mifim le mi-aa, mi thiamsang le
thiamnak nei lo, milian le mi farah, mi tum le mi-te, mirang le midum, micak le
cak lo kan zaten Pathian hmai ih “MISUAL”
kan sinak ah kan bangaw theh. Pathian hmai ih mi sual kan sinak ihsin mi fel
kan sinak ding, mithi ihsin minung kan sinak ding, mi thianghlim lo ihsin mi
thianghlim kan sinak ding le Pathian ral ihsin Pathian fate le a rualpi kan
sisalnak ding ahcun “THISEN” luanter
a tul a si ( Heb. 9:22 ). Cui thisen khal ah thisen thianghlim lawng in Pathian
lung a awiter thei. Nang le kei in Pathian hmai ah dinhmun tha le covo tha kan
ngah theinak dingah Pathian Fapa Jesuh Khrih cun a thisen thianghlim a pe a si.
Cui a thisen thianghlim cun :
1.
A THISEN IN
IN LEI ZO.
Tirhthlah 20:28-31 ah “Amai thisen ih a leimi a kawhhran pawl…”
timi tongfang kan hmu thei. Sual ih tluzo milai cun, sual sal sung ihsin
amahten ziangti hman in suahawk theinak a nei lo. Ziangtluk a fimnak, a felnak,
a thiamnak le a tuannak cu hmang rero khal sehla kumkhua in a tuah thei lo mi
le runaw theilomi milai a si. Pathian Fapa Jesuh Khrih thisen thianghlim
lawnglawng in cutawk saltannak hmun ihsin in luatter theitu le in zalen ter
theitu a um a si. Cucu Pathian in a thei ih, a duhdawtnak luangliam cun kan
saltannak hmun ihsin Jesuh Khrih thisen thawngin in lei ih in luatterzo a si (
Eph. 1:1-10; Col. 1:12-14; 1 Pet. 1:18-21). Pathian Fapa Jesuh Khrih ih thisen
thianghlim cun nang le kei kan tannak, kumkhaw hremhmun ihsin kumkhaw vanram ah
in hruaithleng zo a si. Hitluk sunglawi duhdawtnak neitu Pathian kan neih hi a
va sunglawi so. Unau, Jesuh Khrih thisen cun kan nunnak cu Satan kut sung ihta
in leizo ih kan nih cu mi luat kan si zo. Kan luatnak Jesuh Khrih thisen
thianghlim asinak le asizia kha theithiam aw la lungawinak le hnangamnak in na
khat ding. Thisen thianghlim thletnak hmangin sualsal ihsin zalennak ram ah in
thlengter zo. Pathian duhdawtnak hi!!
2.
THISEN
IN KHOLHFAI KAN SI ZO.
Pathian hmaiah milai cu thianghlim lo,
bal le hnawmhne tenum kan si. Cui kan balhnak, kanmah ih um sual cu kanmahten
kan kholhfai thei lo. Israel pawl cun an sual tlengfainak dingah ran thisen an
rak hmang. Cui ran thisen a luan hnu lawnglawngah an sualnak cu Pathian hmai ah
a fai thei. Cuvek in, kannih misual khal kan mahtei kan sual kan khawlhfai thei
lo ruangah Jesuh Khrih cun a thisen thianghlim hmang in kan sualnak cu in khawlhfaisak
zo a si. Pathian in A Fapa Jesuh Khrih ih thisen thianghlim a hmuh tikah a
thinlung sungah kan sualnak cu a ret nawn lo. Kan sualnak cu a hmu nawn lo ih
kumkhaw hrangah cui’ thisen ah cum mi THIANGHLIM ah kan cang zo. Kan sualnak cu
sendup bang asinan, Jesuh Khrih thisen thianghlim cun vur bangin in var ter zo.
Ziangtluk mi vantha so kan si? Pathian ih duhdawtnak cun A Fapa Jesuh Khrih
thisen hmang in kan sual in kholhfaisak ih in ngaidam zo a si. Pathian hmai ah
sual nei lo kan si thlang. A va sunglawi em ! ( Isaiah 1:18; 1 John 1:6-7; 1
Cor. 6:11; Thup. 1:5-6).
3.
THISEN
IN REMNAK A TUAHZO.
Sual ih milai a tluk hnu ah hmu keukeu
cing in Pathian in Adam cu “Khawi ah na um” ti in a ko. Adam cu Pathian in a
hmu lo si lo in, an karlak ih sual runglut cun an pahnih karlak ih an neih
ringring mi pawlkomnak cu a ticat ih naite ih um si in hlapi ah an um thlang.
Pathian le milai an umtlang leh theinak dingah cun remnak tuah tengteng a tul.
Cui remnak an tuah hlan sung cu Pathian le milai karlak ah pawlkomnak an nei
thei nawn lo. Remnak tuah ding ahcun thisen luanter a tul thlang. Cucu milai ih
tuahthei dingmi a si lo ti Pathian in a theihfiang ruangah thisen thianghlim a
neitu A Fapa Jesuh Khrih cu kan hrangah a run thlah. Fapa Jesuh ih thisen
thianghlim luangmi cun Pa Pathian lung a awiter zo ih , Pathian le milai
pawlkomnak nei theisal dingah a famkim ih a tlamtling zo. Pathian cun A Fapa
Jesuh Khrih ih pekmi le hlanmi a thisen thianghlim ahcun a lungawizo ih, cutawk
ah cun REMNAK cu tuah famkim a si. Kumkhaw hrangah Pathian thawn kan remaw zo.
A va lungawi um tak em!! Unau, tu ah Pathian thawi pawlkomnak nei thei lo ih lo
tuahtu cu sual a si. Asinan, cui sual cu Jesuh Khrih ih thisen thianghlim cun
REMNAK thuthlung a tuahzo ih zalenzet in kumkhaw hrang Pathian hnen ah feh
theinak kan nei zo ti hi na thiefiang zo maw ? ( Rom. 3:23-25; 5:8-11; 2 Cor.
5:18-19; 1 Pet. 3:18; Eph. 2:14).
4.
PATHIAN
THAWN IN NAIHTERTU
THISEN.
Sual cun Pathian thawi kan pehtlaihawknak
a siatsuah theh zo ruangah milai ih thil tuahmi le hnatuannak cun Pathian in
naihter cuang lo ih, kan tuannak le ka tuah venak cu a lak men a si. Tongdang
ih kan rel asile, sual sungih umlai, piangthar hrih lo ih hnatuannak cu alak,
zianghman a si lo tinak a si. Pathian be thei nawn lo, Pathian hnatuannak ih
teltheinak nei nawn lo le thathnemnak nei nawn lo kan si theh. Cui dinhmun ih
kan um laitak ah Jesuh Khrih thisen hmangin a nungmi Pathian hnatuan theinak
kan nei ih ( Heb.9:14), hlazet ih ummi khal Pathian thawn in naihter zo (
Eph.2:13), Pathian thawn tlanlen tlang theinak kan nei sal (Col.1:21-23).
Santlai lo si zo hnu Jesuh Khrih thisen ruangih kumkhaw hrang Pathian naih
theitu kan si le, kumkhaw Pathian hrang hnatuan le rawngbawlnak ih teltheive tu
kan si hi mi vantha kan va si tak em !!
5.
KUMKHAW
NUN IN NEIHTERTU THISEN.
Mihlo, mithi, zianghman lo le
thianghlim lo asimi milai cun Pathian hnen thlentheinak ziangti kawngzawng hman
in a nei thei lo. Sersiamtu Pathian cu Pathian cungnung, Pathian maksak le
Pathian thianghlim a si. Curuangah, cutluk a sangmi Pathian thawn milai a
umtlang ding ti cu thil cang thei lo lawlaw. Pathian in A sersiammi milai thawi
umtlang le a duh fawn. A Fapa Jesuh Khrih thisen lawng in cui dinhmun cu a
thlengdanglam thei ti a theihfiang ruangah le A duhdawtnak maksak ruangah A
Fapa Jesuh Khrih cu kan hrangah a run thlah ( John 3:16) ih, cui thisen luangmi
cun Pathian lung a awiter zo. Mithi si zo hnu in nungter ih, mihlo in hawlsuak
ih, thianghlimlo in thianghlim ter ih kumkhaw thi ding nunnak ih in hruailutu
Jesuh Khrih thisen tluk ih sunglawi le man nei hi an um nawn lo. Halleluiah !!
( John. 6:53-56).
Jesuh Khrih ih thisen luangmi cun
Pathian lung a awiter zo ih kum khaw hrang thiam in coter zo. Cun, kan parah
Satan in zianghman thiltitheinak a nei nawn lo, neh in a umzo. Milai cun
Pathian ngaidamnak a co ih kumkhaw hrang thiamcoter le ngaidam mi ah a cang a si.
Thisen in kan hrang hna in tuansank mi, thisen ruang ih Pathian thinlung ih
ngaidam kan sinak hi a sunglawi na ti ve lo maw !!! ( Isaiah 44:22; 49:15; Saam
103:12; Eph.2:1-9; Heb. 10:17; 1Pet. 1:18-19, 2:24).
0 comments: