Luke 16 : 19 – 31
Lazarus le milian pa ih
thuanthu, Jesuh Khrih in tahthimnak pakhat vek ih a hmanmi a si. A thuanthu cu
Nauhak Sunday school kan kailai ihsin kan theiciami thu a si. Lazarus le Milian
pa ih thuanthu sung kan hmuh bangin, annih pahnih cu an thi veve. An thihhnu ah
fehnak hmun an nei veve. Lazarus cu Abraham tangsung ah a nuamzetin a um.
Milian pa lawngte cu Hell ah fehin, harsatnak tamzet a tuar. Cutawk ih a tongmi
ihsin ralrinnak la sehla :
1. “Ka
Pa Abraham, i zangfah hram aw. Lazarus kha fial aw la a kutzung kha tidai ah
hnimter sehla ka lei daiter dingah ti i run forh seh. Ziangahtile, meisa sungah
ka tuar a hartuk a si”.
Milian pa cu Hell a
thleng ih, Hell ahcun meisa kangnak suangah umin, harsatnak pittawp a tuar timi
cu a auhla ihsin a theihtheih a si. Harsatnak a tuartuk ruangah Abraham hnenah Lazarus
in tidai pe ding tiangin a dil. Hell cu harsat tuarnak hmun, ziangtik hman ih
cem ti um dah lo harsatnak pittawp tuarnak hmun a si. Milian pa cun, a taksa ih
a hal zetmi tidai inn ding cu a dil nan, pek a si nawn lo. Hell ih tuarnak cu
zianghman in sawn theih khal a si nawn lo. Harsatnak hmuahhmuah lak ih
harsatnak rapthlak bik tuarnak hmun a si zia milian pa ih auhla ihsin kan thei
thei.
Hell ram cu lungfimnak
hmun khal a si fawn. Hell ram thlen ruangah thinlung le khuaruahnak a danglam
lo ding timi cu a fianzetmi a si. Milian pa cun, meisa ih a taksa a urnak ruang
ih tuarmi natnak cu a tuar. Cun, meisa kangnak ruangah a ti khal a hal thei
fawn. Hell ahcun, ruahnak lungthin hi a fim kerker ti cu a fiang zetmi a si.
Milian pa cun a thinlung le taksa in Hell ih harsatnak cu a tuar ti cu a fiang
zet. Curuangah, Hell cu, thinlung fim keukeu cing ih tuarnak ding hmun a si.
2.
“Cuti a si ahcun maw ka pa Abraham, ka pa ih inn ah Lazarus kha hei thlah hram
aw. Cutawk ah unau panga ka nei. Lazarus kha va feh sehla annih tal cu hitawk
tuarnak hmun ahhin an ra thlenlonak dingah ralrinnak va pe seh ti ah zangfah ka
dil a si”.
A tlun ih rel zo bangin,
Hell ahcun thinlung fimnak hmun a si ih, milian pa khal thinlung fim keukeu in
Hell ahcun a um. Lazarus khal a thei ih Abraham khal fiangte in a thei. Cun,
Hell ih harsatnak a tuarmi pawl cu a unau dang pawl tuar ding a sian lo
ruangah, Lazarus khan a unau pawl hnen ah Thuthangtha va sim ding a duhsak.
Hell cu umnak tha lo hmun a si ti a theihfiang ruangah, a unau pawl an feh ve
ding a siang lo.
Milian pa cun duhsaknak
thinlung khal a nei nan, cui a duhsaknak cun san a tlai nawn lo. A unau pawl
lawng hman si lo in, midang khal fehter duhlonak thinlung a neih a zumum zet.
Thiltha ngah ding le tuah ding ahcun, milai hin midang duhsaknak kan nei nan,
thil tha lo le nomlonak hmun ahcun midang kan duhsak lo theu. Milian pa khal
hin, a unau pawl ih um venak dingah Hell hi a duhsak lo ti a fiang zet.
Ziangahtile, harsatnak tuarnak hmunpi a si ruangah a si.
Hell ahcun sirawknak khal
a um ding nan, cumi cun san a tlai nawn lo ding. Ziangruangah Pathian ih
duhawntnak ka rak cohlang lo timi sirawknak cu Hell ram ahcun a khat rero ding.
Asinan, cui sirawknak cun umzia a nei nawn lo ding ih, zianghman san a tlai
nawn lo ding. Hell ahcun tu ih milai ih kan neihmi theihnak, ruahnak le
lungthin pawl cu a umlai ding.
Cuti asile, milian pa ih
a fehnak Hell ih feh lo dingin, lamzin kan nei maw? Nei e, Jesuh cun, “Keimah
cu lamzin le thutak le nunnak ka si” tiin John 14 : 6 ah a sim. Jesuh Khrih cun
Hell ihsin luatin, Vanram kan feh theinak ding lamzin in sialsak zo. Jesuh
Khrih ruangah kannih cu Pathian thinlung sungah ngaidammi kan si zo. Cui in
ngaidamnak, thiam in coternak le in tlennak pawl kan nunnak ih kan laklut / zum
a si ahcun, Pathian thawn kumkhua in Vanram ah tlangleng theitu kan si ding. Tu
ih Jesuh Khrih kan zum lo a si ahcun, milian pa bangin Hell ah harsatnak kan
tuar ding nan, ziang san a tlai nawn lo ding. Tu hi caantha a si.
Jesuh Khrih cun tu ah
rundamnak cu Amah rori thiin, a thisen suak in in tuahsak zo. Cui rundamnak in
tuahsak mi cu kan zum duh lo a si ahcun, Hell kan thlen hnu ah tidai forkhat te
hman in pe siang nawn lo ding hokhaw. “Pathian in leitlun a duhdawtzet ruangah
a Fapa neihsun a pe. Zokhal a zumtu cu thi lo in kumkhua nunnak an nei ding (
John 3 : 16 )”
·
Hremhmun lam pantu in,
an hrang Runtu hi,
Thei sehla thangthat an bang lo ding nan,
Nang le kei vanram nunnak neitu in
Kan sim lo cun maw, hrem kan tuar pang ding.
0 comments: