1. Mah Le Mah Zumhmaih-awknak.
2. Mah Le Mah Zohawknak.
3. Mah Le Mah Zangfah-awknak.
4. Mah Le Mah Rinsan-awknak.
Zumtu
pawl kan nunnak cu kanmai ta a si nawn lo ih, kan sung ih nungtu Jesuh Khrih ta
kan si zo. Cuti a si ruangah, zumtu pawl
cun rinsan ding pakhat lawng kan nei ih, Amah cu Pathian a si. Pathian Thu
hmun tamzet khalah, Pathian rinsan ding in simnak kan hmu thei. Zumtu pawl in Pathian
rinsannak tel lo ih thil kan tuahmi pawl ah hlawhtlinnak ngaingai kan ngah thei
lo. Hlawhtlinnak kan ngah a si hman ah, cui kan hlawhtlinnak cun thinlung
diriamnak ngaingai mi a pe thei cuang lo. Pathian
rinsannak / Pathian thuron phah ih kan tuahmi tlun ih kan hlawhtlinnak ah lung
diriamnak a um. Kumkhua hrang Jesuh Khrih ah rundammi kan si zo ih, kumkhua
A hmunmi Pathian hnen ihsin kan ngahmi cahnak thawn kan tuahmi pawl cu kumkhua
ih a hmunmi khal a si fawn.
Mah
le mah rinsan-awknak timi cun, Bible siar lemlo ih Pathian Thu simnak,
thlacamnak tel lem lo ih Pathian Thu simnak pawl a hringsuak. Pathian rinsannak
tel lo nun cun, Bible ka siar lo khalah
ka thei zo pam, ka rak theih dahmi pawl ka sim men ding, thlacamnak thawn ka
hlan lo khalah ka sim tummi pawl cu ka theihciami an si pam timi lungput
pawl a hringsuak. Pathian cu Thlarau a si ruangah, Pathian Thu kan simnak le
kan zirhnak ah, Thlarau Pathian kan sawm a tul. Kan hnenah kumkhua a ummi
Pathian a si ruangah, Pathian Thu ih ke kan karnak ah Amai’ Thu kan thlun
hmaisa a tul tinak a si. Pathian hnenah ziangkim hlan ih kan tuahmi ah
hlawhtlinnak a um ringring. A hnen ihsin cahnak thazang la hmaisa lo ih kan
fehnak zalamtluan ah tluknak khal a rak um theu.
Paul
cun, “Ka tontaih can hi ka cah laitak a
si ( 2 Korin 12:10 )” tiin a sim. Paul cun harsatnak tamzet a tuar nan,
Jesuh Khrih ruangah a tuar thei. Harsatnak le mangbangnak karlak ih a umlai
fangah, taksa dan in cahnak a nei nawn lo ih, a rianmi Pathian rinsan in cahnak
thazang thar a laksal tikah, a nunnak cu cahnak in a khatsawn theu. Pathian tel
lo in zianghman kan tuah thei lo timi hi zumtu pawl hin theifiang sinsin sehla,
kan rinsannak cu Pathian ah kan thum ding thluh ding ih, kan tulmi pawl cu
Pathian in tuahsak sawn ding hi a rak si. Mah le mah theizet, thiamzet, neizet
le tuah theizet ih kan ruahawk sung ahcun kan nunnak ihsin Pathian hmelmawi a
lang lo ding. Pathian lawnglawng hi kan cahnak hrampi a si ti theifiang in,
pumhlum in Amah kan rinsan tikah, kan nunnak ihsin Pathian cu danglamzet in A
cangvai sawn theu a si.
“Bawipa
cu na thinlung zate in RINSAN aw. Nangmai ruahnak le theihnak kha rinsan aw
hlah ( Thufim 3 : 5 )”
0 comments: