“Meisa alh sung ihsin in hum theitu Pathian a um a si ahcun kan biakmi le kan rianmi Pathian lawnglawng a si ih Amah cun na cahnak huham sung khalin in him ko ding. In hum lo a va si hmanah, siangpahrang bawipa, na khawzing cu kan bia lo ding ih na sui milem tuahmi hmai khal ah kan kun lo ding ti cu in theihsak cia aw ( Daniel 3:16-18 )”
Laimi kan zate deuhthaw hin, Christian innsang ihsin suak le thanglian kan si ruangah, kan piangthar maw, thar lo maw a si khal ah Christian kan si zo. Kawlram ih kan ID le ramdang kan feh ih card pakhatkhat kan ngahmi ah, kan biaknak cu Christian a si ringring. Khawmnak, peknak, thangthatnak hlasaknak le hnatuannak lam ahcun kan theitawk in kan tuan ve ringring. Lungawiten kan khawm theu nan, “Ziangruangah Pathian ka bia?” timi theifiang lo ih khawmnak feh tla kan um a phan um zet theu.
Bible sungah, Pathian biatu tamzet kan hmu thei ih, an biakdaan khal a phundang theh ciar hai. Cumi lakah, Daniel ih ruapi pathum pawl ih Pathian biakdaan hin thazang in pe zet. Siangpahrang ih tuahmi milem hmai ih an kun duh lo ruangah, meisa ih thlak ding an si ih, milem bia ding ih lem an si lai khal ah Sadrak, Meshak le Abenago tei pathum cun, “Meisa alh sung ihsin in hum theitu Pathian a um a si ahcun kan biakmi le kan rianmi Pathian lawnglawng a si ih Amah cun na cahnak huham sung khalin in him ko ding. In hum lo a va si hmanah, siangpahrang bawipa, na khawzing cu kan bia lo ding ih na sui milem tuahmi hmai khal ah kan kun lo ding ti cu in theihsak cia aw” tiah an ti. ( Daniel 3:16-18 ).
Daniel ih rualpi pathum nunnak ihsin kan zir theimi tamzet a um ih, cumi lak ihsin kan zir theimi cu, Pathian an biakdaan hi a si. Annih pathum cun, Pathian ih sinak an theifiang ih, an taksa humhimtu a si ti an theifiang. Cumi ihsin Pathian in A hum lo a va si hman ah, Pathian cu biaktlak taktak a si ti an nunnak in an fiang tuk. Pathian phatsanin, milem bia dingih sim an si ih, biak an duhlo. Curuangah, meisa sungah thlak ding an si thlang. Pathian ruangah harsatnak pittawp an hmai ah a um nan, annih pathum cun Pathian an theihfiang ruangah Amah hrang ih tuar cu zianghman poi tinak an nei lo. Pathian biak khal an thulh cuang lo.
Daniel ih rualpi pathum pawl cun, “An biakmi Pathian zo a si” ti an theifiang tuk. Lungawi caan an ton lai khal ah Pathian ruangah ti an thei ih, Pathian hnenah lungawithu an sim thiam. Harsat caan a thlen khalah, Pathian an phatsan cuang lo. Pathian hi ziangtik hmanah a danglam dahlomi Pathian a si ih, milai pawl ih khawruahnak hi a danglam theu. Pathian ih sinak taktak theifiang tui nunnak ahcun, ziangtiklai caan khal ah Pathian ah lungawithu an sim thei sawn.
Paul cun thawnginn sung rori hmanin, “Pathian thawn nan pehzomawknak ah lungawi uh” a ti thei lai. Pathian ih sinak a theihfiang ruangah, khawitawk hmun khal ih um Pathian cu a thangthat thei ringring a si. Zumtu pawl kan nunnak ah, Pathian ih sinak ngaingai theifiang ih kan bia a si ahcun, khawitawk hmun kan thlen khalah Pathian biatu kan si ding. Biakinn, mai umnak inn, hnatuannak le khawitawk hmun khalah Pathian ih sinak theifiang tui nunnak ahcun Pathian lawngin hmun a co ringring. Kan biakmi Pathian theifiang ih biatu zumtu si ding hi, Pathian in kan nun ih in duhmi cu a si.
0 comments: