A THOK, A LAI, A CEMNAK
( Col. 1:11 “Ziang hmuahhmuah kha
thinsaunak thawn na tuartheinak dingah Pathian sunlawinak ihsin a rasuakmi
thazang in lo cakter hram seh”)
Milai kan zate in leitlun khaw eng ih nun hram kan
thoknak cu, kan nui pumsung ah can tawkfang kan um ihsin a si ih, kan rasuah can
in a si hleice. Cumi hnu ah naute, nauhak, tleirawl, fala / tlangval, nu le pa
tiin kan dinhmun a thleng aw vivo. Kan nauhak lai ahcun miin kan parah
ruahsannak thazet an nei nan, a netnak lam ah zianghman si lo kan si thei ih,
mi hrekkhat cu a thoknak vekin a nettiang hlawhtling khal an um thei. Zumtu
pawl kan nunnak khal cuvek a si. Pathian fate kan sinak hramthoknak cu, Jesuh
Khrih ih hrinthar kan si can kha a si. Jesuh Khrih ah hrintharnak cotu kan si
veten, Khristian nun ah ke kan kar thok ih, zumtu pitling si ding kha kan Pa ih
in zoh rero mi a si.
Thil pakhat khat kan tuah thok ih, hlawhltinnak thawn kan
tuahsuak tikah, lungawinak thawn kan khat. Asinan, mi tampi in in theihpi lomi
cu, a thoknak le a netnak karlak ah ziangtlukin kan zuam, can kan pe ih kan
tuan timi kha a si. Pathian in nang le keikhal hlawhtlinnak thawn Amah tong
dingin in duh. Hlawhtlinnak thawn Pathian tongtu kan si theinak ding ahcun,
Jesuh Khrih ah kan thok zo ih, tu hi kan feh rero lai a si. Tu ih kan umdan,
kan tuah dan, kan tuan dan le kan feh dan hi a thupi zetmi a si. Pathian hmai
ah hlawhtlinnak thawn kan thlen theinak ding ah, tui can hi kan tuan rero lai
can a si. Tuini ih kan tuan dan ih zirin, kan hlawhltinnak cu a lang leh ding.
Zumtu pawl, Jesuh Khrih ah kan Khristian nun kan thok zo
ih, mawi le tha zet ih thehtu kan si theinak ding ah, tufang ih kan dinhmun hi
a thupi zetmi a si. Pathian Thu ih ke kan karnak ah, harsatnak kan tuar can
khal a um ding nan, cumi pawl tuarsuak ih hlawhtlinnak nun neitu dingah Pathian
ih duhmi kan si. Tufang hi can laitak ih kan din can a si. Na umnak hmun ihsin
hlawhtlinnak lamzin ih na feh rero lai ah, harsatnak na tuar tla a si ding.
Phang hlah aw, bawmtu Pathian kan nei a si. Pathian hnenah bawmnak dilin,
Pathian hnen ih kan ausuak a si ahcun Anih cu in bawm dingin a man rinring.
Pathian sunlawinak ihsin a rasuakmi cahnak thazang cun nang le kei hi in bawm
duh a si. A net tiang hlawhtling zumtu kan si theinak dingah, Bawipa ko uhsi.
0 comments: