Zumtu pawl kan
vanthatnak cu, hmunkim ih um Pathian cun ziangtik lai can khal ih in umpinak hi
a si (Isaiah 7:14; Matt. 1:23, Saam Psalms 139:7-12 ). Pathian ih in umpinak
thuhla cu, Khristmas can le Biakkhawm can ah kan rel tam zet. Pathian cu kan
hnenah, kan sungah, kan kiangah, kan tlunah le hmunkip ah umtu a si. Voi tampi
ahcun, Pathian cu kan hlawhtlin can le tlaksam can, kan lungawi le riahsiat can
le kan nunnak ih thil pakhat khat a thlen can ah in umpinak hi kan thei hlehle
cuang. Kan palhmi cu, khawitawk kan feh khalah kan hnenah Pathian a um nan,
sual kan tuah can ahcun kan hnenah Pathian um lo vek ih kan ruat theumi hi a
si.
Immanuel Pathian cu kan
hnen ih um ringring Pathian a si ruangah, sual kan tuah can khalah kan hnenah a
um ve ti hi zumtu pawl hin kan theih a thupi. Sual kan tuahlai fang ahhin,
Pathian cu ninghang zetin kan kiangah a um ve ti hi theihhngilh hlah uhsi. Biakinn
ih khawm can, thlacam can, peknak pek can, Bible siar can le Pathian duhnak
lamzin ih kan feh can lawngah Pathian hi kan hnenah a um a si lo. Sualnak
lamzin ih kan feh rero lai khalah, Immanuel Pathian cu kan sungah a um
ringring. Kan din, kan to, kan it, kan feh le kan tuan can ah, Pathian cu kan
hnenah a um ringring. Pathian hi ziangtik lai can khalah ka hnenah a um
ringring ti hi theifiang deuhdeuh sehla cun, zumtu pawl hin sualnak lamzin
ahcun kan feh ringring lo ding nan.
Kan kiangah kan tihzahmi
mii pakhat a um cun, a duhlomi zianghman kan tuah ngam lo. Amah kan tihzahnak
ruangah sual khal kan hrial. Zumtu pawlin kan biakmi, kan rinsanmi le kan
tihzahmi hi Pathian a si ih, cui Pathian cu sual tuah tum ih kan timtuah can le
kan tuah ngaingai can khalah kan hnenah a um ringring. Pathian kan tihzah
ngaingai ih, kan hnen ih a um timi thuksin ih kan theifiang a si ahcun, sualnak
cu tuah loin kan um thei ding a si. Ziangahtile, Pathian tihzah cu sual huat a
si ( Thufim 8:13 ). Pathian ih umpinak theifiangtu cun, Pathian ih duhmi a duh
deuhdeuh ih, Pathian ih huatmi a hua deuhdeuh. Pathian ih duhmi a tuah ih,
Pathian ih huatmi a tuahlonak ihsin a nunnak ah Pathian ih hmelmawi a langsuak
a si. Pathian ih umpinak theifiang aw la, amah thawn sual na tuah ngam lo ding.
“Immanuel
Pathian ih umpinak theifiangtu pawl cun, sual lamzin an zawh nawn lo”
0 comments: