Jeremiah
23:24 “Ka hmuh thei lonak tiang ih a relh theitu zohman an um lo. Lei le van
khua zakip ih ka um hi nan thei lo maw si?
Zumtu tampi lakah,
Pathian cu can bikhiah le hmun bikhiahnak lawng ih biak theih tiin kan ruat
theu. Innsang khawmnak le biakinn ih kan khawm can lawng hi Pathian biaknak
hmun le can tiih ruattu khal kan um theu. Hivek tikcu can cu, hmunkhat te ih
Pathian biakkhawmnak hrang can tuahmi a si. Biakinn ih kan khawm can ahcun, kan
neihmi hnipuan lak ihsin a thabik le mawibik thawn, thiangfaizet in kan feh
theu. Biakinn sung lawng hi Pathian umnak le Pathian biak theinak tiin kan ruat
sual theu. Biakinn sung ih kan umlai ahcun kan nuncan a thazet. A lenglam ih
kan tuahmi thil dangdang pawl tla cu Biakinn sungah kan tuah ngam lo. Biakinn
leng kan thleng vete cun, kan tuah kelte kan tuah ringring thotho theu.
Pathian Thu ih in simmi cu,
Pathian cu hmuntin ih um Pathian a si ( Saam 113:5, 123:1, 139 :8 ; Jeremiah
23:23-24; Efesa 2:22 ). Cuti a si ruangah, Pathian cu innsung, biakinn le hmun
bikhiah kan neihmi lawng ih um si lo in, hmuntin ih um Pathian a si. Hmunti ih
um Pathian a si ruangah, khawitawk hmun khalah Pathian cu biak a theih. Hna kan
tuannak ah, tlawng kan kainak le kan fehnak hmunkipah Pathian cu biak a theih
ringring a si. Hmuntin ih Pathian ti hi thuksin in kan nunnak in theifiang
sehla cun, Biakinn sung ih kan um vek in khawitawk ih kan um khalah kan um thei
ding. Hmuntin ih um Pathian cu ziangtiklai can le khawitawk hmun khalah biak a
theih. Hlanhlai khalah, Samaria pawl e Judah pawl cun hmun bikhiah ah Pathian
biak ding ti’n an rak zum dah ve ( John 4:20 ).
Zumtu pawl, Pathian cu
khawihmun khal ih um Pathian a si ruangah, khawitawk hmun khalah Pathian cu
biak a theih ringring ti hi a thar in kan theisal kei uh. Kan inn ih kan um ah,
hna kan tuannak ah, kan fehnak hmunkip ah Pathian hi a um ti thei in, ziangtiklai
can khalah Pathian betu kan si kei uh. Hmuntin ih um Pathian a si ti kan theih
ahcun, Pathian cu tlaitluan kan be ringring thei. Biakinn ih kan um can le sual
kan tuah can khalah Pathian cu kan hnenah a um ti hi kan theihfiang ahcun,
sualnak cu hrial in Pathian duhdan thawn Pathian kan be thei ding a si.
“Hmuntin ih um Pathian cu khawitawk hmun khalah kan be
ringring thei”
0 comments: