Tulai zumtu tampi lak
ah, Pathian Thu vek ih nung in relaw si, Pathian tihzahnak ngaingai nei lo, mai
milai pi lawng tihzahtu kan tam zet. Pathian Thu vek ih nung, sim le zirh vek
si, Pathian duhdan hnakih milai duhdan thluntu kan tamzet thlang. Pathian ih
hmuhdan hnak in, milai ih hmuhdan thupi zetih ruattu khal kan tam vivo thlang.
Pathian ih simtermi sim lo in, milai ih duhmi sawn simtu khal kan tam vivo
thlang. Kan ka lawngin Pathian ka tihzah ti phuangsuak si, nunnak ngaingai ih
Pathian tihzahnak hmuh ding um lo kan tamzet thlang.
Pathian tihzah timi cu, “sual
huat” ( Thufim 8:13 ) le Pathian Thu thlun a si ( Thusimtu 12:13 ). Khawsia
pawl khalin Pathian an tih ih, a khurh in an khur ve ( James 2:19 ). Pathian
tihzah ngaingaitu pawl cun, khawitawk hmun khalah Pathian ih umpinak
theifiangin, Pathian ih duhdan an hawl ringring. Pathian ih duhdan kha a
pakhatnak ah retin, Pathian duhdan in Pathian Thu an sim, an zirh, an nung ih,
Pathian duhdan vekih nungin sual an hrial sawn. Rualpi pawl in mipi duhdan in
Pathian Thu sim dingih an forh khalah, Pathian mithmai zoh sawn in, Pathian
duhdan in a phuangsuak. Rualpi pawl in sual tuah ding in an sawm khalah, a
rualpi pawl hnak in Pathian mithmai zoh sawn in sual a hrial sawn theu a si. Paul
cun, “Milai hmai ih hminthatnak ka hawl
a si ahcun, Khrih ih hnatuantu ka si lo ding ( Gal. 1:10 )”a ti.
Pathian tihzahnak taktak
kan nei lo ih, kan milai pi lawng kan tihzah a si ahcun, ziangtiklai can khalah
sual kan tuah ringring thei. Kan tihzahmi nu / pa a um ahcun sual tuah ding kan
tih. Asinan, kan tihzahmi nu / pa an um lo vete cun, khawitawk hmun khalah sual
kan tuah man hngal mai. Milai mithmai lawng zoh ih kan um sung ahcun Pathian
tihzahnak ngaingai kan rak nei hrih lo tinak a si. Pathian tihzahnak ngaingai
nun neitu kan si ahcun, kan umnak hmun pohpoh ah sual hrialtu ding kan si ti
le, khawitawk hmun pohpoh khalah Pathian thangthattu ding kan sinak kan
theifiang ding.
Pathian
hnak in na pastor, nan khawhhran upa, na nu le pa, na unau, na rualpi le midang
na tihzah sawn a si ahcun, an um sung lawngah sual na hrial ding ih, an um lo
vete cun duhduh in na nung thei. Pathian na tihzah a si ahcun, khawitawk hmun
khal hi sual hrialnak le thiltha tuahnak a si ti na theifiang ding.
0 comments: