Matthai
16:24, “Jesuh in A dungthluntu pawl hnenah, ‘Zokhal keimah thlun a duhtu cu
amah ih duhnak kha tanta in a thinglamtah phur in i thlun seh”
Zumtu kan zate hin,
Jesuh Khrih in in tuahsakmi Rundamnak cu zumnak thawn kan cohlan veten mi
piangthar kan si ih, Jesuh Khrih ih dungthluntu kan si hngal. A tlun ih Bible
cang tarlangmi ah, Jesuh Khrih cun amah dungthluntu pawl in, hmuar nei zet ih a
dung an thlun theinak ding hrang simmi a nei. Cumi pawl kan nunnak ih kan thlun
vivo thei a si ahcun, Jesuh Khrih ih dungthlun tha kan si thei ding.
1.
Mai’ Duhnak Tanta Ih Jesuh Khrih Thlun.
2.
Mai’ Kross Phur In.
3.
Jesuh Khrih Thlun.
Jesuh Khrih dungthlun ih
Khristian nun feh hi, taksa dan ahcun a harzetmi a si nan, thlaraulam dan ahcun
a nuam bikmi a si. Jesuh Khrih tongkam ah, “Zokhal keimah thluntu..” timi kan
hmu. Keimah a ti ruangah, kan thlun dingmi cu Jesuh Khrih lawnglawng a si.
Jesuh Khrih ih cangvaihnak ah cangvaih ve, A fehnak ah feh ve, a tuahmi tuah
ve, a duhmi duh ve ih a dungthluntu ding kan si.
Hebru cangantu cun, “Kan zumnak a thoktu le famkimtertu Jesuh
Kha cat lo in zoh uhsi ( Hebru 12:2 a )” tiin a sim. Kan zoh dingmi le kan
thlun dingmi cu Jesuh Khrih lawnglawng a si. Jesuh Khrih cun lamzin dik le
thutak lawnglawng ah in hruailut ding. Jesuh Khrih zoh ih Khristian nun feh hi taksa
dan ahcun a harzetmi a si. Kan kiangkap ah thil dangdang a ra thleng rero mi a
um ding ih, cupawl cun Jesuh Khrih zohnak ihsin pial ding in in lem rero ding.
Kawhhran
hrekkhat ahcun, Pathian Thu hnak in Daan le Dun tuahmi in a uk thluh thlang
ruangah, Jesuh Khrih ih duhnak thlun sawn lo in milai ih tuahmi Daan le Dun in
a uk thluh thlang. Zumtu pawl, leitlun can tawite kan nun sungah, Jesuh Khrih
zoh ih kan feh ringring lo si ahcun hlawhtlinnak ngaingai kan nei lo ding.
Jesuh Khrih zoh ih, a tuahmi vek kan tuah vivo a si ahcun Dungthluntu Tha kan
si ding a si.
Jesuh Khrih dungthluntu tha cun, Jesuh Khrih
kha zoh ringring in, amai duhnak hnak in Pathian Thu kha thuneitu sawn ah a
ret. Jesuh Khrih leitlun a ratsan Rundamnak Thuthang cu sim le phuan ding in a
man ringring a si. Jesuh Khrih dungthlunthu tha kan si theinak dingah Pathian
thlawsuah um hram seh.
0 comments: