( Semtirnak
12:10 – 20)
Abraham
cu Pathian ih kawhnak cohlang in ramtiam pan ih a fehsuak nakah, harsatnak
nasaten a tuar. An feh reronak hmun ahcun pam nasaten a tlung ih, umnak ding
hmun tha hawl in an um. Culai ah, Abraham cun harsatnak an tuarmi pawl cu
Pathian hnenah thlen hmaisa lo in, amah in khua a khang hmaisa. Cui a
khawkhannak cu, a Nupi Sarah kha thuphan simtu ah a canter. Cun, amah khal in
harsatnak a tuar ih Izipt siangpahrang khal in harsatnak a tuar thu kan hmu
thei. Pathian cun Abraham cu a umnak hmun ihsin a kosuak ih, ramtiam a panpi
lai ah, Amah rinsan ding in hniksaknak a thlenter nan, cui hniksaknak ahcun
Abraham cun thil a tisual riai a si.
Pathian
in zumtu pawl khal kan umnak hlun ihsin Jesuh Khrih hmang in in kosuak zo ih,
ramtiam a simi van pan in in fehter rero. Cui kan fehnak lamzin ahcun,
harsatnak khal kan tuar a tul can a um. Harsatnak kan tuar tikah, Pathian cun Amah rinsan ding hi a duh
ih, cumi hrangah kan tuar ding in a thlenternak khal cu a si. Ziangahtile
Pathian cu kan beunak a si ruangah ( Nahum 1:7; Saam 5:11, 9:9, 27:5, 46:1 ).
Harsatnak kan tuarmi pawl hi kan Khristian nun a pitlinnak ding hrang ih Pathian
hmanmi a si. Harsatnak kan tuar tikah, cui harsatnak sungih to cuahco, beidong,
nuncau le ruahsannak nei lo vek ih kan um ding hi Pathian in a duhlomi a si.
Cuhnak in, kan beunak a simi Pathian pan zangzang ding hi kan nunnak ihsin
Pathian ih a hmuh duhmi cu a si.
Milai
dan khalah, hlawhtlinnak kan ngahnak ding hrang lamzin sauzet kan feh a tul ih,
cumi lai ah harsatnak kan tuar can a um. Cui harsatnak pawl kan pahtlang ngah
hnu ah hlawhtlinnak kan ngah theu. Cuvekin, kan Khristian nun zalamtluan ah,
Pathian duhdan ih kan nun ih, Jesuh Khrih nunmawi kan nunnak ih a lang vivo
thei nak ding ahcun harsatnak kan tuar a tul. Harsatnak kan tuar lai takah, kan
harsat tuarmi hnak ih tumsawn le thil tithei sawn Pathian a um ti kha thei in,
Pathian hnenah kan riahsiatnak le aihainak pawl kan thlen a si ahcun, Pathian
cun “Tuarnak phen ih thlawsuah” cu
in coter tengteng ding a si. Harsatnak kan tuar canah, kan Beunak Lungpi a simi
Pathian hnenah tlanlut thiamtu kan si ding hi a thupi zetmi a si ( Thusim 18:10
).
“Kan tuarmi
harsatnak hnak in Pathian a tumsawn”
0 comments: