( 1 Korin 2:16 "........Sikhalsehla kannih cu Khrih thinlung neitu kan si" )
Milai zate ih kan nunnak ah, Jesuh Khrih cu zumnak thawn kan cohlan hlan ahcun hremhmun tla ding kan si. Ziangtluk in kan tha, kan fel, kan zuam, kan tuan ih kan tuah a si hman ah, hell ram feh ding nunnak lawng neitu kan si. Jesuh Khrih ih rundamnak cu keimai hrangah tiih kan cohlan tik ahcun, Jesuh Khrih cu kan sungah a rung nung ( Gal 2:20 ) ih, Jesuh Khrih thinlung neitu kan si thlang a si.
Jesuh Khrih ih thinlung neitu kan si zo ruangah, kan nunnak taktak umnak vanlam ruat ih um ding kan si. Kan nunnak ngaingai cu van ah thuh in a um zo ( Colose 3:1 - 3 ). Jesuh Khrih ah kan nunnak zaten a um zo ruangah, in uktu ding le kan nunnak ih lalbik sinak cotu ding cu, kanmai minung sinak si lo in Jesuh Khrih sawn a si ding. Kan nunhlun cu Kross ah khenbet in a um zo ih, kan thi zo. Thlan ah phum in a um zo ih, thlan ah kan tan zo. Jesuh Khrih thawhsalnak ah kan thosal ih, Jesuh Khrih ih nun tawmpitu kan si zo ruangah, nunnak ah thawhtermi kan si zo a si.
Jesuh Khrih thinlung neitu hi, Pastor lawng, Evangelist lawng, Missionary lawng, Kawhhran Upa lawng tivek in Pathian Thu cun in sim lo. Jesuh Khrih rundamnak cotu kan zate hin Jesuh Khrih thinlung neitu kan si theh. Jesuh Khrih thinlung neitu kan si ahcun, kan duhmi le kan huatmi, kan feh duhnak le kan feh duhlonak, kan ei duhmi le kan hrial duhmi pawl cu Jesuh Khrih ih tuah dan le ti dan vek a si a tul. Jesuh Khrih ih thinlung neitu cun, a thinlung neitu Pa ih duhdan in a nun a tul a si.
Jesuh Khrih thinlung neitu kan si ruangah, kan tuah duhmi, kan feh duhnak, kan duhzawng, kan uarzawng le kan tuanmi cu Jesuh Khrih ih tuahdan vek a si a thupi. Jesuh Khrih cun leitlun milai zate hrang sualthlah thawinak tuahnak dingah Kalvari tlang parah a thi. A thinlung ngaingai cu, MI HLO RUNDAM ding a si. Jesuh Khrih leitlun a ratsan cu, leitlun mi zate in RUNDAMNAK an ngahnak ding hrang a si. Jesuh Khrih thinlung a putu zumtu pawl khal in, Jesuh Khrih ih thupi a ti bikmi, leitlun mi zate ih rundamnak an conak ding hrang thupi bikah ruattu ding kan si.
“Jesuh Khrih Thinlung Neitu Kan Si”
0 comments: