Hebru 9:1 – 14
Israel mipi pawl ih sualnak cu
Pathian in a ngaidam theinak ding hrangah raithawinak an tuah a tul. Israel
pawl cun Puanthlam an sak ih, cui puanthlam sung ahcun puithiam sang in Israel
mipi pawl hrang thawinak a tuahsak theu. Puithiam Sang in thawinak a tuah
tikah, ran thisen a hmang. Cui ran thisen cu puanthlam sung ih a luhpi hnu ah,
Pathian ngaidamnak cu Israel mipi pawl cun an co.
Himi an tuahmi hin Jesuh Khrih ih
thihnak le a thisen thianghlim ih in tlennak ding a rak hmuhsak. Israel mipi
pawl sual ngaidamnak ding hrangah thisen a tul vek in, kannih milai pawl sual
ngaidamnak ding hrang khalah thisen luan a tul ve ( Heb 9:22 ). Cui thisen luan
dingmi cu a thianghlimmi thisen a si a tul. Milai zohman in kan tlin lo
ruangah, Pathian cun A Fapa neihsun Jesuh Khrih cu nangmah le keimah sual
ngaidamnak hrang a run thlah ( John 3:16 ). Israel mipi pawl cu ran thisen
hmang in an sualnak ngaidam a si nan, kannih cu Jesuh Khrih thisen zarah
ngaidammi kan si.
1. Israel pawl sualnak aiawhtu
cu ran thisen a si. Kannih sual
aiawhtu cu a thianghlimmi Jesuh Khrih
thisen a si.
2. Israel pawl ih thianhlimnak
cu ran thisen in a si. Kannih ih kan thianhlimnak cu Jesuh Khrih thisen a si.
3. Israel pawl hrang sualthlah
thawinak tuahsaktu cu, milai menmen ( Puithiam Sang ) a si. Kannih hrang sual thlah thawinak in
tuahsaktu cu, kumkhua ih a nungmi Jesuh Khrih a si.
4. Israel pawl sual ngaidamnak hrang an thahmi rannung cu thlarau nei lo a si. Kannih hrang sual
ngaidamnak in tuahsaktu cu Jesuh Khrih,
kumkhua ih a nungmi a si. Kan rundamnak cu Jesuh Khrih ah a si ruangah, kan rundamnak cu kumkhua ih a hmunmi a
si.
5. Israel pawl hrangah kumkhat
voikhat sualthlah thawinak tuah a tul. Kannih hrang sual ngaidamnak cu Jesuh Khrih cun a thisen hmang in kumkhua
daih in tuahsak zo a si. Kumkhua hrangah ngaidammi kan si. Amen.
0 comments: