Milai
zate hin Pathian in rundamnak kan ngah ding hi a duhbikmi le thupibik ih a
retmi a si. Cun, Pathian fate a si zo pawl nunnak ah, thanglian sinsin ih
Khristian nun pitling kan neih ding hi Pathian ih duhmi a si fawn. Jesuh cu, “Nunnak kan neihnak ding ah le nun tam kan
neihnak ding ah” a ra a si ( John 10:10 ). Zumtu pawl kan nunnak ah, Jesuh
Khrih bangnak ih kan than theilonak tamzet a um ding. A tamsawn cu Keimah
ruangah a si.
1.
Mah Le Mah Zumhmaih-awknak.
Zumtu
tampi kan nunnak ah, Pathian ram hrang hnatuantu dingah rundam kan si ti kan
thei aw ko nan, kanmai nunnak kan zoh tikah, “Himi cu ka tuah thei pei maw. Kei ngai in ka tlin pei maw. Kei ngai ih
tuahthei ding ka si lo. Kei cun ka tlin lo ding, thiamnak zianghman ka nei si
lo” timi khawruahnak pawl hin hmun a luah duh zet. Cuvek ih kan ruahawknak
cu satan cun can tha la in, tuan suak lo in dunglam in kirter theu. Zumtu pawl
cun kanmahten zianghman tuah theimi kan nei lo. Asinan, kan sung ih nung Jesuh Khrih ( Galati 2:20 ) ih cahnak in pekmi
thawngin ( Phil. 4:13 ) Pathian ram hrang tuan theitu kan si ti kan theih a
thupi. Jesuh Khrih thawngin tuan thei ka si / na si ti hi fiangten kan thei sal
ding ih, mah le mah zumhmaih-awknak tanta in Pathian ram hrangah kan titheitawk
in kan tuan ding a si.
Setan
cun ka thiam lo, ka tuah thei lo, ka tlin lo ti ih kan ruahawk lai ah, kan thiamlonak
le kan tlinlonak pawl par ih tlinnak le tuahtheinak in petu Pathian kan rinsan
ding hi a phang tuk. Pathian rinsan ngam lo ding in le Pathian Thu ih kekar ngam
lo ding in kan dung le hmai, kan keh le vawrh in in bawh ringring. Mi cak lo ka
si ti kan theihawk veten a cakmi Pathian kan rinsan a tul. Mi thiam lo ka si ti
kan theihawk veten lei le van sersiamtu Pathian kan rinsan a tul. Kan tlinlonak
zawnte ih Pathian kan rinsan a si ahcun, Pathian in cahnak thazang thar in pe
ding ih, A ram hrang hnatuantu ropi ah in tuahser thei a si.
Pathian
in hman thei lomi a neih lo ruangah, nang le kei khal Pathian in in hmang thei.
Kan cahlonak, kan atnak le kan thiamlonak zawnah Pathian rinsantu ding kan si.
Paul in cui nun cu a tep ngah zo ruangah, a cahlolai ah Pathian a rinsan ih, “Ka tontaih can hi ka cah laitak a si”
tiin 2 Korin 12:10 ah a sim. Cumi ih tican cu, “Taksa ah zianghman ti theimi ka nei lo ti ka theihfiang tikah, A Cak
Pathian ka rinsan ih, cahnak in ka khat a si” ti hi a si. Pathian rinsan ih
kan nun can hi thlaraulam ih kan nun a fehtluan can a si.
Kan cahlonak ah
Pathian kan sawm a si ahcun, Pathian ih in thuamnak zarah micak dinhmun ah kan
ding thei a si.
0 comments: