( Suahlannak 3 :
1 – 4 )
Moses
cu a pu ih tuu khalin nelrawn ih a um rero laifangah Pathian kawhnak aw a thei.
Pathian kawhnak aw a theihlan ah, Pathian cun a kiangah hrambur a kang reromi le
hrambur sung ih vancungmi cu a hmuh ter. Cui a thil hmuh mi cu ziangha a si ti
thei dingin “nai deuhin a zoh”
tikah, Pathian kawhnak aw a thei a si. Nai deuh ihsin a va zohmi, a kang reromi
meisa lak ihsin Pathian kawhnak aw cu Moses cun a thei. Pathian in Moses a
kawhzawng ih a hmanmi cu, hrambur kang rero a si.
Pathian
hi kan kiangnaite ah a um ti kan thei nan, Pathian ih aw theifiang ngaingai
dingin Pathian Thu cu nai deuh in kan zoh tum lo. Hlaral ihsin kan thei men
fangfang tikah, Pathian ih aw kan thei lo theu. Pathian cun leitlun minung zate
rundamnak cu Jesuh Khrih ah a tuahfel zo. Rundamnak a tuahfel zomi kan cohlang
ko nan, cui rundamnak sung ih Pathian in tuanvo in pekmi pawl kan thei lo theu.
Rundamnak hrang ih tuan timi si lo in, zumtu cu “Hnatuan tha tuantu ding ih rundam ( Efesa 2:10 )” kan sinak sawn
kha rel duhmi cu a si. Pathian in ziang in tuanter duh, ziang in fial duh,
ziangtin in hmang duh timi kan nunnak ih kan theihfiang theinak ding ahcun,
kanmah rori in Pathian Thu cu nai deuh ih kan zoh a tul a si.
Paul
cun, “Bawipa in tuahter a lo duhmi kha
hawl uh” tiin Efesa 5:17 ah in sim a si. Pathian ih tuahter in duhmi kan
theihfiang ih, Pathian Aw kan theihtheinak ding ahcun, kanmah rori in Pathian
Thu cu nai deuh ih kan zoh / hawl a tul. Mi ih simnak ngaimi, mah rori ih Bible
siarnak le thlacamnak thawn kan tikcu can kan hmang a si ahcun, Pathian ih Aw
kan theifiang ding ih, Pathian in tuahter in duhmi khal kan theifiang ding a
si. Bible cu Pathian Awkam suak a si ih ( 2 Timote 3:16 ), Thlarau Thianghlim
hruainak hnuai ih nganmi ( 2 Peter 2:21 ) a si ruangah, “Pathian Thinlung” tiih
kan kawh khalah a sual tampi lo ding. Pathian ih Aw cu Bible ah a kim theh
ruangah, Pathian Aw kan theihnak ding ahcun Bible sung ih kan hawl rori a tul a
si. Pathian Aw thei ding cun, mah rori in “Nai
deuh ih Pathian Thu hawl” a tul a si.
“Pathian pan
uhla A lo pan ve ding ( James 4:8 )”
0 comments: