( Jeremiah 29 :
13, “ In hawl ding in in hmu ding. Nan thinlung takte ih in hawl ahcun”. )
Tumkhat
cu mi pakhat hin company pahnih ah part time in hna a tuan. Cui company pahnih
pawl hnen ahcun full time ih hnatuan ding tumtahnak a nei veve. Company pakhat cun
hnatuan ding a um hmaisabik kha an sim hngal ih, anih khal in hnatuan ding a
nei ringring. Company pakhat sawn cun hnatuan ding an neih veten midang an hawl
hmaisa ih, remcang an um nawn lo hnu ah anih cu an rak ko. Tumkhat cu cui
company pahnih cun full time hnatuantu ih la ding in an sim veve. Full time ih
tuan ding a si thlang ruangah pakhat lawng a hril a tul. Anih cun, hnatuan ding um hmaisabik ih amah kotu
company kha a hril sawn a si.
Pathian
cun a fale pawl hrang ziangkim in tuahsak ding in a ralring ringring. Asinan,
kanmah lam ihsin Pathian kan pan dan a dik lo theu ruangah Pathian ih kutcak hi
kan nunnak ah kan tep ngah lo theu. Pathian cun, “Thinlung takte ih I hawltu pawl in in hmu ding” tiin a sim.
Thinlung hrek thawn hawltu pawl in Pathian ih kutcak siar ding an hmu dah lo. Kan
nunnak ih thupibik dinhmun ah Pathian kan ret a si ahcun, Anih khal in mi thupi
dinhmun ah in khaisang ve ding a si. Pathian cu mi hmuahhmuah hrang ziangkim
tuahtu a si nan, thinlungtak te ih Amah hawltu le pantu pawl nunnak ah Pathian
asinak kha a langter cuang. Pathian ngaihsak lo le, Pathian Thu ziang ih
siarlotu pawl cu, Pathian khal in mak a ti ve lo theu ih a ngaihsak tuk lo
theu.
Pathian
cu thiksia Pathian a si ruangah, Amah hnak ih thupit termi kan neih tikah
Pathian cun in thik. Kanmai duhmi kan tuah ngahhnu, kan neihmi can kan mai
hrang kan hman hnu ih a tangmi, a hleifuan can pawl Pathian hrangah kan pe
theu. Curuangah Pathian khal in kan nunnak a hmang thei lo. Pathian hnak ih
thupit termi na nei a si ahcun, Pathian khal in nang hnak ih thupi ih a ruatmi
pawl a khaisang hmaisa ding. Midang hnenah a thlawsuah pawl a pe ding ih, cumi
ih hleifuan fang lawng kha nang a lo pe ding. Thinlung zate in, thinlung taktak
thawn Pathian kan hawl a si ahcun, Pathian in kan nunnak hmang in thil sunglawi
a tuah thei a si. Thinlung takte ih Pathian hawltu kan si ding hi, zumtu pawl
ih kan tuanvo tumbik lak ih pakhat a si ve a si.
“1 Samuel 2: 30
- I sunloih sawntu kha ka sunloih ve pei ih, I hmuhsuamtu cu ka hmuhsuam ve
ding”
( Hminsin :
Pastor Caleb Biak Lal in, Jeremiah 29:13 nak hmang ih thu a simnak ihsin
thazang ngahmi ngansalmi a si )
0 comments: