( Kolose 3: 1 – 17 )
Tumkhat cu
tlawngta pakhat hi tlawng uniform hruh duh lo in, amai tha a timi le mawi a
timi pawl a hruh. Amai ruahnak ahcun tlawng uniform hnakin ka neihmi a mawi
sawn tiin a ruat. Zirhtu cun tlawngta a si ruangah tlawng uniform hruh dingin a
sim. Tlawngta cun hruh duh cuang lo in a mai thuamhnaw neihmi pawl cu a hruh
thotho. A netnak ahcun tlawng zirhtu cun tlawngta cu a dawi ih, “Tlawng uniform na hruh tikah tlawng ra
kaisal aw” tiin a dawi. Tlawngta cu tlawngta a sinak ihsin dawisuak a si lo
nan, tlawng uniform a hruh duh lo ruangah tlawngin thawn an pehtlaih-awknak a
cat sung. Tlawng uniform a hruh hnu ah tlawngah thaten a kai ngah sal.
Milai zaten
sual ih paimi ( Saam 51:5 ) kan si ih, kan tuar dingmi cu kumkhua Pathian thawn
thenawk a si. Asinan, Pathian fapa Jesuh Khrih ih in tuahsakmi ruangah kannih
cu Pathian fate tiih kawh kan si sal. Kan sungah Jesuh Khrih cu rung nung in (
Galati 2:20 ), vanrammi sinak neitu kan si ( Filipi 3:20 ). Vanrammi sinak
neitu kan si zo ruangah, nitin kan nunnak ihsin lang dingmi cu vanlam nunmawi a
si. Kan nunnak taktak cu Khrih thawn Pathian ah kan um zo ruangah, kan nunnak
taktak a simi Jesuh Khrih ih hmuihmel cu kan nunnak ihsin langtertu ding zumtu
kan si. Kannih cu tlangpar ih ummi meifar bangtuk kan si ih, kan tleunak, kan
mawinak le vanlam nun kan neihmi pawl cu mi in an hmuh a tul. Culawng lawngah
kan nunnak ihsin Pathian hmin a sunglawi ding ( Matthai 5:16 )
Leitlun ah
kan umlai nan, leitlun ta kan si lo. Asinan, leitlun ta vek in leitlun ih duhmi
pawl lawnglawng kan nunnak ih kan hruh ringring tikah, vanrammi si cing in
vanlam thawn kan dawr-awknak a cat theu a si. Lei tisa duhnak lawnglawng ih kan
nun kan hman can ah, vanlam thawn hla aw in kan um theu ih, kan nunnak a ro, a
cau ih Pathian Thu ah feh thei nawn lo in can kan hmang theu. Pathian fate,
vanlammi sinak neitu kan si ruangah, kan hruh dingmi nunzia cu vanlam nunzia a
si tengteng a tul. Pathian duhzawng ziaza tha thawn nung ding zumtu kan si ( 1
Peter 2: 11 – 12 ). Zumtu pawl kan tahfung thabik cu Jesuh Khrih a si. Jesuh
Khrih nun thawn kan nun zohfiahaw phah ih nitin kan nunnak kan hmang a si
ahcun, Jesuh Khrih ih nundan cu kan nunnak in a langsuak ding a si.
“Vancungram minung
sinak a neitu cun vancung rammi pawl nundan in a nunnak cu a thuammawi aw”
0 comments: