THLACAMNAK A LAK DAH LO
( Kum 24 thla a cam hnu ah a pasal piangthar )
Jeremiah 29:11 ; Saam 27:14
Zumtu pawl
kan nunnak ah, Pathian hnen ih kan dilmi kan ngah hngalmi a um ih, kan ngah
hngal lomi a um rualin kan ngah lomi khal a um. Mi tamtak in thlacamnak thawn
can reizet Pathian an buan hnu ih an ngahmi khal a um ve. US ramsung, Louisiana
ramthen ih Alexandria timi khua ah George Warshaw le Lou Warshaw tei nupa an
um. Kum upa lam veve an si hnu, July 24, 1991 ih nei aw an si. An pa George
Warshaw hi Juda biaknak thluntu a si ih, Lou Warshaw lawngte piangthar a si. An
neihawk ihsin an pa hi a piangtharlo ti a theihfiang ruangah, piantharnak a
ngah theinak dingah thlacamnak a neihsak ringring. An neihawknak kum 24 a kim
kumah, George Warshaw cun Pathian ih duhdawtnak cohlang in, piantharnak a hmu
ih, Pathian hmai le mipi ah tihnimnak khal a la.
An pa ih
piantharnak ding hrang thla a camnak thuhla thawn pehpar in Lou Warshaw cun, “Kan pai’ hrang thlacamnak ka neihsak
tinten ka thinlungah setan in hna a tuan ringring. Ka thlacamnak hi Pathian in
in theihsak lo ding vekin le hlawhsam ih um ding vekin setan cun hna a tuan.
Asinan, Pathian in ka pasal a piantharnak ding hrang lamzin a tuah ding timi
zum hngetnak ka nei. Pathian ih tikce le milai tikcu an bangaw lo. Milai cun tu
ih thlacam, tu ih ngah hngal kan tum theu. Pathian cun tul a ti can ah kan
thlacamnak hi in sang theu a si” tiin a sim. George Warshaw hi Lou Warshaw
thawn an neihawk hnu ah Alexandria ih Calvary Baptist Church ah khawm ringring
tu a si ve.
Zumtu pawl
kan nunnak ah, Pathian hnenah thla kan cam ih kan ngah lo can a um theu. Kan
ngah hngal can khal a um thei ih, lehhnu deuh ih kan ngahmi khal a um theu. Bawipa hi Amai can ih cangvai theutu
Pathian a si. Kan hrang siatralnak ding in tuahsak lotu Pathian, kan hrang
a thabik in tawlrelsak ih thlawsuahnak in petu Pathian a si. A thlawsuah kan
dilmi in pek ding tikcu hngakthiamtu kan si ding hi Pathian ih duhmi sawn a si.
Pathian cu Amai cangvaih can theitu Pathian a si ruangah, kan tul tikcu thei in
thlawsuah in pe theu. Pathian ih in tiamcia bangin, zumtu pawl ih kan tuanvo cu
Pathian hnenih thlacamnak thawn kan duhmi thlen a si. Pathian hnen ah
thlacamnak thawn kan thlenmi pawl hi Pathian in a hmu theh ih, tul a ti canah
kan nunnak ah famkim zetin a thleng ter theu. Bawipai’ cangvaih can cu
thlacamnak thawn hngakthiamtu kan si a thupi.
“Amai’can ih cangvaitu Pathian cu khua a tlai dah lo. Amen”
( Note : Baptist Press Thuthang ih an nganmi “101-year-old's salvation caps
wife's 24-year prayer” timi a remcan dan ih ngansalmi a si )
0 comments: