( Suahlannak 33:15 – 16
)
Israel mipi
pawl cu Pathian riantu Moses ih hruainak thawn Egypt ram ihsin an suak ih,
Pathian in pek ding ih a tiammi Kanan ram pan in an feh vivo. Kanan ram pan ih
an feh rero lai ahcun, Moses hnenah Pathian in, “Israel mipi pawl hi Kanan ram
na hruai thleng ding ih, nehnak khal ka lo pe ding. Cawhnawi le khuaitizu
luannak hmun ah nuamzet in nan thleng ding. Asinan, kei cun ka lo fehpi lo ding ( Suahlannak 33: 1 -3 )” tiin a
sim.
Moses le
Israel mipi pawl cun lamzin ih an ral pawl an neh ding ih, cawhnawi le
khuaitizu luannak hmunah nuamzet in an thleng ding. Asinan, Pathian in, ‘Ka lo
fehpi lo ding’ a ti tikah Moses cu a um thiam lo ih, “Kan hnenah na feh lo ding a si ahcun hi hmun ihsin in fehter nawn hlah
( 33:15 )” tiin a Pathian hnenah a sim. Hmun nuam zet, Pathian in a tiamciami
ram ah thleng ding an si nan, Pathian
tel lo cun Kanan ram luh ding a duh lo.
Zumtu pawl
kan nunnak ah, kan hmai ah Pathian ih thlawsuah tumzet le tamzet um sehla,
Pathian tel lo in cui a thlawsuah lawng centu kan si duh pei maw? Hrekkhat cun,
“Thlawsuah ka co takah” titu kan um
ding ih, “Pathian tel lo cun thlawsuah
lawng cu ka cen ngam lo” ti tu khal kan um ding ka zum. Pathian in
thlawsuah tamzet in pe nan, cui a thlawsuah kan comi cu Amai’ hrangah kan
hmangsal lo, Amai duhnak ah kan hmang lo ih, Pathian tel lo in kan cen tikah,
buainak le harsatnak tamzet in in tlak theu a si. Pathian ih thlawsuah um liailiai khal sehla, Pathian thawn kan
hmangtlang lo a si ahcun, umzia ngaingai a um thei lo.
Pathian cun
a thlawsuah in pekmi pawl cu Amai’ ram hrang hmanter in duh. Cawhnawi le
khawitizu luannak a simi thlawsuahnak hmunah in ret thei. Asinan, Pathian tel
lo ih a thlawsuah lawng cen ding cu a tihnung zetmi a si. Pathian a tel lo
ahcun, ziangtin kan hmang ding, ziang hrangah kan hmang ding timi kan theithiam
lo dingih, kanmah harsatnak in thlentu ah an cang riangri thei sawn a si.
Pathian in nitin kan nunnak ih thlawsuah in pekmi pawl hi, Amah thawn
hmangtlang in, Amai duhdan ih hmangin, A ram karhzainak hrang hmangthiamtu kan
si ahcun nunman nei zumtu kan si ding. Pathian
tel lo nun cu tihnungbik nun a si.
“Bawipa tel lo ih kan
fehnak hmun ah Lungawinak nun a um ngaingai thei lo”
0 comments: