Nangmah Rori Ih Na Thlun A Thupi

Luke 11:28

Tumkhat cu mi pahnih hin rawlei ding na neih nawn lo ruangah rilrawngzetin an um. Cuti ih an umlai ahcun, rawlei ding tamzet neitu cu an kiangah a ra ih, an pahnih cun rilrawngzet ih um an si ruangah an ei duh ding ti ruahsannak thawn rawlei ding tamzet a ra pe hai. Pakhat sawn cun rilrawng a si ti theifiangaw zetin a congahmi rawl cu puar le tlaizetin a ei ih, pumpuarzet ih a um hnu ah lungawiten a fehnak ding hmun ah a fehsal. Pakhat sawn cun a comi rawl cu ei duh lo in a ummen ih, rawlei ding nei cingin rawl a ei duh lo ruangah a umnak hmun ihsin thawn thei nawn lo in a um ringring.

Zumtu pawl kan nunnakah, a tlun ih tahthimnak vek ih nungtu kan tam. Hrekkhat cu Pathian Thu ah an ril a rawng ti thei in, thusimtu pawl ih an simmi Pathian Thu an nunnak ah lalut in an thlun tikah, Khristian nunmawi neitu ah an cang. Hrekkhat cu Pathian Thu ah thanglian ding an si ti thei cingin, Pathian Thu an theihmi pawl thlun duh lo in an umsan men theu. Pathian Thu ihsin lam kan pialcan, Pathian vek ih kan nun lo canah, kan nunnak tundin a sinak ding ahcun Pathian Thu lawng hi a tulmi umsun a si. Na tuah dingmi, na thlun dingmi le na fehnak ding hmun cu Pathian Thuthangtha simtu pawlin an lo khihhmuh ih, na feh a si le na hrang lungawinak le diriamnak in na khat ding. Asinan, an lo sim cing ih na feh duh lo a si ahcun, na hmai ah riahsiatnak in a lo hmuak ding.

Kawhhran tha ih kan um le um lo, Pastor tha kan neih le neih lo, Kawhhran Upa, Nu Upa le Mino Upa tha kan neih le neih lo ahhin kan thlarau nun hi a thumaw theh lo  ( Zirhnak dik lo Kawhhran a si ahcun cutluk ih a poimi cu a um lo ). Pastor le hruaitu pawlin na fehnak ding lamzin cu Pathian Thu thawn an lo khihhmuh cingih na feh duh cuang lo a si ahcun, umzia a um cuang lo. Thlarau Thianghlim cun na tuah dingmi, na thlun dingmi le na fehnak ding hmun pawl cu Pastor le hruaitu pawl hmangin a lo sim ringring. Cui lamzin ah kannih cu a fehtu ding kan si. “Tuisun ah Pathian aw ( Thusimtu, Bible le hruaitu pawl hmangin Pathian ih aw kan thei theu ) nan thei a si ahcun………. nan lungruh ter hlah uh ( Hebru 3:15 )”. Pathian in thusimtu pawl hmangin na lamzin a lo khihhmuh mi ih na thlun a si le na hrang Pathian khawkhanmi na congah vivo ding.

“Bawipa in thusimtu pawl hmangih lamzin dik in khihhmuhmi ah fehtu, thluntu na si maw?”

• Tweet
• Share
• Share
• Share
• Share