1. Noah
: Noah cu mi menmen a si ih, Pathian
ih fialmi vekin lawng a tuah. Noah sanlai ah ruah a rak sur dah lo ruangah,
tilik ding thu le, tilik ihsin luatnak ding hrang Lawng tuah cu atthlak zetmi a
si. Asinan, Noah cun Pathian ih thu a thlun ruangah, a innsang rundamtu ah
Pathian in a hmang a si.
Nitin kan nunnak ah,
thiamnak nei le, fimnak tlasam, neihnak ih mi bang lo kan si hman ah, Pathian
Thu ih ke kan kar ahcun, kanmai nunnak hmangin Pathian in hna a tuan thei a si.
Pathian in hman thei lo a nei lo nan, hman duh lo mi lawng a nei. A hman theimi
ka si ahcun, kanmah hmangin thil maksak a tuah thei a si. Bawipa thaw cun
midang in nunnak lamzin an hmuh theinak ding hrang lamzin khihhmuhtu kan si
thei a si.
2.
Daniel : Daniel cu Babilon mi in
Israel pawl an kaihlai ah saal dinhmun ih an rak kaihmi a si. A nunnak ah
Pathian a theifiang ih, Pathian a theihfiangnak ruangah, siangpahrang inn ih zu
le sa cu ei le in lo in a um. Cuvek ih a umnak ruangah a tlasia lo ih, a mawi
sinsin. Zumtu a si ruangah nitin voithum thlacamnak a nei. Cui a thlacamnak cu
misual pawlin sualpuhnak ah hmangin Kiosa puk sung tiang a thleng. Asinan,
Pathian a rinsan ih, A rinsanmi Pathian cun a nunnak a humhim a si.
Sahrang puk le harsatnak
sung khal ih runhim theitu Pathian theifiangtu Daniel ih nunnak ah Pathian hmin
a sunglawi. Nang le kei khal, kan nu ih pum sung ihsin in semtertu Pathian cun,
ziangvek caan khalah in kilkhawi thei ringring a si ti rinsan ngamnak kan nei a
si ahcun, kan nunnak hmangin Pathian hmin a sunglawi ding a si.
3.
Peter : Peter cu ngaikai ih
pumcawm aw a si ih, nitin a hnatuan cu Galilee tipi ih nga kaih a si. Jesuh
Khrih thawn an tonawk ngah hlan ahcun cui a pumcawm awknak hmun ahcun a tikcu
caan hmuahhmuah a hmang theh. Peter cu a ngai kaihnak ah hlawhsam ih a um hnu,
Jesuh Khrih ih thusimmi a thlunnak ruangah, manbangza thil a nunnak ah a thleng
a si. Jesuh Khrih ih thu a lun / a ngai hlan ahcun, mi hlawhsam Peter a si.
Asinan, Jesuh Khrih thusimmi a lun / a ngai hnu, Jesuh Khrih thusimmi vek ih a
tuahnak hmun ah mi hlawhtling Peter ti ih kawhmi ah a cang sal.
Jesuh Khrih thusimmi a
thlun hnu ah Peter cun hlawhtlinnak pahnih a ngah. Pakhatnak ahcun, Taksa daan
in Peter cu hlawhtlinnak a ngah. Nga kai thei lo ih a um hnu, Jesuh Khrih
thusimmi vek ih a tuah ngah hnu ahcun a pumcawmnak Nga cu tamzet a kai a si.
Pahnihnak ahcun, Thlarau lam daan ih hlawhtlinnak a si. Jesuh Khrih thusimmi
vek ih a tuah ngah hnu ah, Thlarau lam daan in a nunnak cu thleng danglam a si
hngal. Jesuh Khrih zo a si ti a theifiang ih Jesuh Khrih dung a thlun hngal. A
damsung Jesuh Khrih dung a thlunnak ah Jesuh Khrih in, “Milai kaitu na si ding”
a timi cu famkim ten a nunnak ah a thleng ih, Thlarau hlo kaitu ah Pathian in a
hmang a si.
Nang le kei khal,
Pathian Thu kan zum ngam ih, Pathian Thu vek ih ke kan karsuak ngam a si ahcun,
kan nunnak ah Peter ih thlawsuah comi kan co ve ding a si. A Thu par ih
dinghnget Pathian cun, kan nunnak hmangin thilmak le danglam a tuah thei
ringring. Thilmak le danglam kan nunnak ihsin a langsuahnak ding ahcun, kanmah
in Pathian Thu kan thlun ta a tul a si. Kan zum ngam zat ih phuangaw theutu
Pathian a si.
0 comments: