( Nicky Cruz Ih Thuanthu Tawi )
US ramsung, New York khawpi ih misual rual umkhawmnak
Mau-Maus Gang ih an hotu cu Nicky Cruz a si. Amah hi December 6, 1938 ah Las
Pirdras, Puerto Rico ah a suak. Kum 15 a si ah, a nu le pa cun New York ih a
upa hnen ih um dingin an fehter. A nu hin a kawk nasa thei zet ih, “Setan fa”
tivekin a kawk ringring. A nu ih kawknak ruangah duhtu nei lo in a thei aw ih,
New York khawpi lamzin kap ah a vaktawi. Mau-Maus gang pawl thawn an tonawk hnu
ah, an hnen ah a lut ih, thlaruk hnu ah an hotu ah a cang.
Mau Maus gang pawl cu an sual zet. An hnen ah Pathian
thusimtu David Wilkerson cun Pathian Thu a va sim. David Wilkerson cun Nicky
Cruz cu, “Jesuh Khrih in a lo duhdawt, A lo duhdawtnak hi cemni nei lomi a si”
tiin tumhnih thu a sim nan a hlawhtling lo. Nicky Cruz cun a hmai ah a rak beng
ih, that dingin a rak hro.
Tumkhat cun David Wilkerson cun Mau Maus pawl piantharnak
ding duhsaknak thawn Boxing thongnak hmun ahcun thusimnak a nei. Mau Maus pawl
an ratnak dingah tiin Bus khal an tawlrel sak. Nicky Cruz cun David Wilkerson
ih thusimnak panin Bus par ih a tolai ahcun, a thil tuahmi pawl hi a tha lo
tiin ruahnak a nei ih, thla a cam. A hmun an thleng, David in thu a sim theh
hnu ah Cruz le a rualpi pawl cu mipi hnenah an duh ahcun paisa khawng dingin a
sim. An khawn theh hnu ah Cruz cu a lung a thleng ih, paisa pawl cu David
Wilkerson hnen ah a pe sal.
David Wilkerson in thusim a theh hnu ah, Jesuh Khrih ih
rundamnak cohlang duhtu pawl an tonak hmun ihsin suakkhawm dingin a sawm hai.
Cutawk ah mangbangza zetin Mau Maus pawl an suak ciamco. An hotu Nicky Cruz
khal a tonak ihsin a poksuak ih, David Wilkerson thawn thlacamnak an neih hnu
ah, a lung a thleng ih Pathian duhdawtnak cohlangin Pathian hnenah ngaidam
dilnak khal a nei cih.
Khawm an theh hnu ah, Mau Maus Gang ihsin piangthar pawl
cun an meithal, namte le thilri dangdang pawl cu palik hnen ah an pe. Palik
pawl cun an thil hmuhmi cu mak ti tukin an rak zohhai. Nicky Cruz cun Bible
College ah fehin Thuthangtha a zir. Cumi hnu ah Pathian Thu a sim vivo ih, Mau
Maus Gang ih an hotu Israel Narvaez khal Jesuh Khrih hnenah a hruai sal a si.
Nicky Cruz cu Pathian Thuthang phuangin a caan a hmang
peh vivo. Nicky Cruz Outreach timi a din ih, Pathian Thuthangtha, rundamnak thu
cu mi tamzet hnenah an ausuahpi rero. Pathian hin hman thei lomi a nei lo ih,
Amah duhtu, pantu le A hnen ih lungsir ih fehtu pawl hnenah Pathian asinak a
langsuak theu. Mi ziangvek khal thleng danglam theitu cu A nungmi Pathian lawng
a si. Biaktlak Pathian kan biak ngah ve hi mi vantha ngaingai kan si.
“Miin
kan nunnak an siar tik ah Jesuh Khrih ih nundan mawi an siar ngah maw?”
0 comments: