(
Voltaire Ih Thuanthu Tawi )
France ram ih biazai le ca tamzet ngantu François-Marie
Arouet, a cafung hmin ih Voltaire timi hmin phuahtu cu November 21, 1694 ah
suakin, May 30, 1778 ah kum 83 mi siin a nunnak a liam. Voltaire hin a
damsungah ca tamzet a ngan ih, France ramsung ih ca ngantu lak ah an
theihhngilh dahlomi le leitlun tiang khal ih hmin nei a si. Voltaire cun ca a
ngannak le thu a simnak pawl ahcun Christian pawl hi a do zet ih, caan reilote
ah Christian pawl cu an hlo ding tiin reltu a si. Amah hrimhrim hi leitlun ih
biaknak zate in relsetu a si.
Voltaire cun, “Christian biaknak cu tuihnu kum 100 ahcun
a hloral theh ding ih, thuanthu khal ah theih nawn lo ding tiangin a hloral
theh ding. An zummi Bible cu, Museum ih thil ummi pakhat tluk fang a si” tiin a
rak sim. A Thihzawng ahcun, “Milai le Pathian ih hnonmi ka si zo. Thlaruk sung
damnak in pek ahcun ka neihmi zate ih a hrek ka lo pe ding. Hell ah ka feh ding
ih, ka hnen ah na feh ve ding Jesuh….Aw Jesuh Khrih” ti khalin a rak au.
A damlai ah Christian pawl a donak thuhla le a thatlonak
thuhla pawl khal tamzet a sim. Kum 83 mi siin a nunnak a liamlai khalah,
Christian pawl an phumnak thlanmual ah phum rak duhlotu a si. Cutluk ih
Christian pawl dodaltu a si nan, a thih ihsin Kum 50 nak ah, a innpi cu Geneva
Bible Society cun Bible ngannak hmun, “Bible Printing Press” ah an hmang.
Pathian cu A nungmi Pathian a si ih, A Ka ihsin suak Thu
khal a nungmi a si. Matthai 5:18 ahcun, “…Lei le van a um sung cu Daan sung ih
daan terek bik pakhat hman a hlo lo ding….” tiin Jesuh Khrih cun a sim. Cun,
Mark 13:31 ah, “Van le leilung hi a cemral ding nan ka tongkam cu a cemral dah
lo ding” tiin Jesuh in a sim. Pathian Thu cu ziangtik hman ih cemral dah lo,
hloral thei lo le kumkhua ih a hmunmi Thu umsun a si ( Isaiah 40:8, Saam 119:
89, Luke 21:33 ).
Pathian Thu hmuhsuam nautattu pawl ih nunnak zoh tik ah,
an nunnak ah Pathian Thu a nunzia a langsuak. Hmuhsuamnak tongkam tongtu pawl
ih nunkhua khal a sau lo. Cumi cu Bible sungkhal ih kan hmuh theimi le thuantu
khal ih kan hmuh theimi a si. Cuvekin, Pathian Thu ih umtu, Pathian Thu vek ih
nungtu pawl ih nunnak ahcun Pathian in hmun a co ih, A Thu a khaisan rualin A
Thu ih umtu pawl khal khaisan an si hngal theu. Kumkhua a hmunmi Pathian Thu ih
thumawk le, Pathian Thu thlun hi leitlun ih thil mankhung bik, sunglawi bik le
manhla bik a si.
“Buaipi
tlak, atcilh tlak le duh ding tlak cu Pathian Thu hi a rak si”
0 comments: