Protestant a rak dinsuah lai ah, the five sola timi hi a rak larzetmi
a si ih, Protestant a rungsuah veten, Bible sirhsanin an rak ngansuahmi a si.
Sola timi cu “Lawng ( Only )” timi a si ih, cumi pawl tla cu :
1.
Sola
Scriptura: “Scripture alone”
2.
Sola
Fide: “Faith alone”
3.
Sola
Gratia: “Grace alone”
4.
Solo
Christo: “Christ alone”
5.
Soli
Deo Gloria: “To the Glory of God alone”
1. Sola Scriptura : Pathian Thu Lawng ( Scripture Alone )
Sola Scriptura timi cu, Pathian Thu hi thuneihnak sangbik neitu a si. 2
Timothy 2:16 ahcun, “Ca Thianghlim hi Pathian thawtkhummi an si” ti a si ih, 2
Peter 2:20-21 ahcun, “Thlarau Thianghlim hruainak hnuai ah Bible hi ngan a si
thu tarlang ai sal. Kumkhua a nungmi Pathian ka ihsin a suakmi tongkam an si
ruangah, a sual thei lo le a palh thei lomi Bible a si. Bible an ngan lai ah,
Thlarau Thianghlim hruainak ih nganmi a si ruangah, kumkhua ih a dikmi Thlarau
cun, a dikmi Thu lawng a nganter ding. Pathian Thu hi kan nunnak in uktu,
thuneitu umsun a si.
2. Sola Fide: Zumnak Lawng ( Faith Alone )
Sola fide cun, Jesuh Khrih ih rundamnak in tuahsakmi cu, kan tuah venak le
tuan venak pakhat hman tel lo, zumnak ih kan cohlanmi a si thu kha a sim duhmi
a si. Rundamnak cu Pathian in Jesuh Khrih ah in tuahsak zo ih ( John 3:16 ),
cui rundamnak cu mai hrang ih rak zumnak hmangin kumkhua nunnak kan ngah a si (
Eph 2:8-9 ). Rundamnak ah milai in tuah theimi zianghman kan nei lo ih, Pathian
in a lak ( Free ) rori ih in tuahsakmi a si. Cumi cu kannih in Zumnak thawn kan
rak cohlan lawnglawng ah kan nunnak ah a takin a langsuak a si.
3. Sola Gratia: Zangfahnak Lawng ( Grace Alone )
Sola Gratia timi cun, rundamnak cu kanmah ih tuahthatnak zianghman a um lo
lai le, Pathian hmai ih mithi ( Eph 2:12 ), mihlo ( Rom 5;10 ) kan si lai ah,
Pathian ih zangfahnak cu kan parah a runglang ih, A Fapa neihsun in pe. Cumi cu
A zangfahnak ruangah tinak a si. “Tuannak ih ngahmi si lo, Pathian ih lansawng
cu Rundamnak a si ( Eph 2: 8-9 ) tinak a si. Pathian ih zangfahnak lawnglawng
ih rundam mi kan si ti simduhnak a si.
4. Solo Christo (Solus Christus ) : Jesuh Khrih Lawng (
Christ Alone )
Solo Christo ( Solus Christus ti khalin an ngan theu ) timi cun, Rundamnak
cu ah Jesuh Khrih lawng ih tuan theimi a sinak kha a sim duhmi a si. Minung kan
zaten Evi le Adam ih tluksiatnak ruangah Pathian hmai ah misual kan si. Cui kan
sualnak ihsin in rundam theitu ding leitlun milai, van ih ummi lak khal ah an
um lo. Rundamnak tuah theitu cu Jesuh Khrih pakhat lawnglawng hi a si.
5. Soli Deo Gloria: Pathian Sunlawinak Hrang Lawngah ( To
The Glory of God Alone ).
Soli Deo Gloria timi cun, ziangkim kan tuahnak zaten Pathian sunlawinak
hrangah siseh timi a sim duhnak a si. Kawhhran sung ih kan tuannak hi, Kawhhran
hruaitu, pastor le sungtel pawl ih lungawinak le sunlawinak hrang si lo in,
Pathian sunlawinak hrangah tuah ding timi a sim duhnak a si. 1 Corin 10:31 nak
ah, “Curuangah, nan ei ah siseh, nan in ah siseh, ziang thil nan tuahmi kip ah
Pathian sunlawinak hrangah tuah uh” timi hi Soli Deo Gloria ih hrambun awknak
cu a si.
Sola panga pawl hi, tuihlan ih zumtu hmaisa pawlin Pathian Thu an rak
hmuhdan an ngansuahmi a si ih, tuini nang le kei ih tuah dingmi khal a si fawn.
Pathian Thu lawng hi kan nunnak in uktu hrampi si sehla, Thiang Thlarau bawmnak
thawn zumnak in Pathian ih in tuahsak mi rundamnak cu kan ngah thei ih, cumi cu
Pathian ih Zangfahnak lawnglawng a si. Jesuh Khrih lawng hi kan hrang rundamnak
in tuahsaktu a si ruangah, kan nunnak khal a sunlawinak hrang ih hmangtu ding
zumtu kan si.
( Note : Got Question ih ta le ca
dang siarmi sirhsanin nganmi a si )
0 comments: