America ram company pakhat ih an hotu Scrooge tluk ih tirhfak le sual hi an
um nawn lo ding tiin a hnatuantu pawl cun an rel rero theu. Paisa a hawl, paisa
a ngahmi cu pungthang neiin mi a cawih ih cutin a thinlung ah paisa lo cu a um
thei lo. Sumpai lo cu leitlun ah duhmi le ngainatmi zianghman a nei lo. Sumpai
ti lo cu sungkhat neihmi khal a nei lo. Tirhfak a si vekin puai nikhua a thleng
ding hi Scrooge cun a hua ngaingai. Christmas rung thlen ding tla hi cu a huat
in a hua. Carol singing va feh pawl tla hi a rak tlun kir ter theu. Sumpai nei
milian tiin an ti nan a tirhfaknak cun zohman ih nel theihlo ah a canter.
Zan khat cu Scrooge ihhmu thawzet in a it ih mang danglam tak a nei. Cui a
mangah cun a rualpi Mary thawn an rak lengtlang. A rual Mary cun “Scrooge,
tuvek ih na um ringring ahcun thinlung nuam le hnangam ten na thi thei lo ding.
Tui na thinlung ih ummi sumpai, duhamnak, tirhfaknak le hamtamnak thinlung
thawn na thi ding sokhaw. Curuangah na umdan le na thinlung ken daan pawl hi na
thleng a tul thlang a si” ti’n a sim. Scrooge cu a hung thang dukdi ih cui a
mang cu a ruatsal rero.
Nauhak lai ihsin a duh emem mi a first love Susan cun nei aw ding ih tim an
tuah rero lai ah a thihsan ih, a nau Rose khalin tuanten a thihsan. Cun, duhmi
pakhat a runnei leh ih cui a duhmi khal cun pasal dang a neih san lala. Cui a
tuarnak pawl cun a thin a ti danglam ih, mahtei um le umhar a sinak cun
thildang ruatter lo in duhamnak le mai tanghmasialnak ah a thlen a si.
Zarhpi zingkhat ah Scrooge cu lamleng in a vak. An inn kiangte ih um, a
hnatuan tu tei inn kiang a thlen cun thlacam khawmnak an rak neihlaitak a si.
Cui an thlacamnak aw cu a vun thei. “ Kan pu Scrooge hi tirhfak zet a si cu kan
thei nan, amai ruangah ei le in ding kan nei. Curuangah amah hi kan nunnak a si
ih a hrangah cat lo in tla kan camsak ringring ding” ti ih pa bik tongkam a vun
thei cu Scrooge cun thu tampi a ruat peh vivo.
Mi parah thatlonak a nei cing in mi dang cun a hrangah thla an camsak
ringring ti a theihsuak cun a lung a thleng ruangro. A thinlung sungah cun Alms
Hospital cu a runglang hngal. An Doctor in a thihsan ih tu ah an Nurse pakhat lawng
in cui sizung ah cun a tuan rero. A tim a tuah ih sizung lam pan cun a feh
hngal. Cui sizung ih nurse cun Scrooge a rak hmu cu a lau dukdi. Scrooge cun a
dip sung ihsin ca pakhat a suah ih nurse nu hnen ah cun a tul naknak ih hman
dingah ti in sumpai suahnak ca cu a pe. Cuvek ih Scrooge a thlengawk cu mak a
ti tuk ih a zum ban lo. Asinan, a thil hmuhmi cu a taktak a si ko. Cumi hnu
hrimhrim ah Scrooge ih mithmai ah lungawilonak a um nawn lo. Tlaitluan ih
lungawinak in a khat ringring. Harsa bomnak ah a neihmi cu a hmang vivo.
0 comments: