Duhdawttu Theihfiangnak



Luke 8:26 - 39

Jesuh Khrih leitlun a lenlai ah, mi dam lo a damter, khawsia polhmi a damter, mi zeng le damlonak dangdang thawn a na tu pawl khal a dam ter. Cumi lak ah, khawsia polhmi pakhat, inn le lo nei lo, hni le puan khal hruh lomi pakhat a tel ve. Jesuh Khrih thawn an tongaw ih, Jesuh Khrih in damnak a pe. Jesuh Khrih ih tidamnak a theihfiang hnu ahcun, khawsia polhmi pa cun Jesuh Khrih hnenah, “Na hnen ah in fehter ve aw” tiin a dil. Tuihlan ahcun duhdawttu zohman nei lo, mi ih ziangkhal ih an siar lo, lamzin kap ih ummi minung men a si. Duhdawtnak famkim neitu Jesuh Khrih thawn an tonawk ngah hnu ahcun, Jesuh Khrih in a natnak hmuahhmuah a damter, a sungih ummi khawsia khal a suahter. Cutluk ih duhdawttu, lainattu le tidamtu Jesuh Khrih hnen ihsin hmundang a feh tum nawn lo.

Leitlun milai zate tlun ih duhdawtnak famkim neitu Pathian ih duhdawtnak cu cem ni a nei lo, thleidan a nei lo ih mi zokhal duhdawt theitu a si. Pathian ih duhdawtnak luangliam, Jesuh Khrih ih runglammi cu mi zate hrangah a si. Jesuh Khrih in rundamnak in tuahsakmi hi, kan tlin ruangah, kan fel ruangah le kan that ruangah a si lo ih, misual, mi tha lo, mithi, mi dik lo le mi tenum kan silai fangah a si. Tluksiatnak ruangah Setan fa kan si ih, kumkhua ih hremhmun feh ding kan si. Cutluk ih dinhmun siabik ih ding kan si lai fangah, Pathian cun kan hrang Jesuh Khrih in run pe a si. Pathian ih duhdawtnak cu, santlai lo le zianghman ti theimi nei lo ih kan umlai can ah a si. Pathian ih in duhdawtnak theifiangtu pawl cun duhdawttu Pathian hnen ihsin an tlan thei nawn lo. Duhdawttu hnen ih um hi an hril sawn.

Zumtu pawl kan nunnak ah, dinhmun sebik ih kan umlai fang ih in duhdawttu Pathian ih duhdawtnak hi ruatin Pathian Thu ih kekar ding kan si. Pathian ih duhdawtnak theifiangtu pawl cun, leitlun hi zianghman ah an siar nawn lo ih, duhdawttu Pathian hrangah an nung. Paul cun Pathian duhdawtnak a theihfiang hnu ahcun a thihtiang Pathian hrang a nunnak a hlan aw. Zumtu hmaisa pawl, missionary martyr ih a thitu pawl nunnak kan zoh asile, Pathian ih duhdawttnak an theifiang ih, cui duhdawttnak cun an nunnak ah hmun a khuar ih, an nuncem tiang rinum takin duhdawtttu hrangah an nun an hlan. Pathian in nang le kei in duhdawt ih, in duhdawttu Pathian cun Amah duh ding hi in phutmi a si. Jesuh Khrih ziang dinhmun ih na umlai ah a lo duhdawt ti na theih thuk vivo asile Amah na duhdawt sinsi ding.


“Duhdawttu Pathian theifiang tu pawl cu A hnen ihsin an tlanhla thei nawn lo”

Related Posts:

0 comments: