Ka Cah Lo Lai Ah Ka Cak



2 Korin 12 : 9 - 10

Paul cun a taksa ih natnak a tuarmi ruangah Pathian hnenah thlacamnak a nei nan, Pathian cun “Ka zangfahnak cu na hrangah a tawk a si, ziangahtile na tontaih can hi ka cah bik can a si” tiin a let. Paul cu taksa ih damlonak a neihmi ruangah Pathian cu a buan ih, thlacamnak thawn Pathian a pan ti a fiang. Taksa dan ih kan cah lo can ah Pathian kan pan ih, Thlarau lam dan khalah zianghman ti theimi kan nei lo ti kan theihfiang tikah Pathian kan buan. Cuvek ih tikcu can kan hmannak ah Pathian in a cahnak cu kan nunnak hmangin a langter theu hi a si. Amen.


Pathian tel lo cun milai nunnak cu zianghman a si lo ih, thlaraulam nun khalah zianghman ti theimi kan nei lo. Thusimnak, Pathian hnatuannak ih kan telnak, thangthatnak hlasaknak pawl khalah, Thlarau Thianghlim hnatuannak a tel lo ahcun midang nunnak ah hmual a nei thei lo. Pathian Thu ah ke kan karih, Pathian ih hmanmi kan sinak ding ahcun kan dinhmun kan theihfiang a thupi ngaingai. Pathian tel lo ih kan dinhmun cu zianghman a si lo ti kan theihfiang tam pauh a si le ziangkim tithei Pathian hnenah kan tlanlut deuhdeuh ding. Pathian hnen ih kan tlanlut tam pauh le kan nunnak cu Pathian in a kutcak thil titheinak langsuahnak ah a hmang ding.


Zumtu pawl hi Pathian hmai ahcun bungbel vek ih tahthimmi kan si ( Jeremiah 18:1-12; 2 Tim 2:20 – 21 ). Bungbel cun a tuahtu tlunah thuneihnak zianghman a nei thei lo. A tuahtu ih tuahdan vekin a cangsuak. Zumtu pawl kan nunnak ah, thlaraulam dan ih mi pitling, Pathian hmantlak kan si theinak ding ahcun kanmahten zianghman tuah theimi kan nei lo ti hi kan theih hmaisa a thupi. Pathian hmai ah pumhlum ih hlanaw in, kan cahlonak kan hlanaw ding. Pathian cun titer-aw pawl le mah le mah rinsan-aw pawl a hmang dah lem lo. Ahmai ah zianghman si lo ti thei aw ih pumhlum ih nun hlanawtu pawl nunnak ah Pathian cun asinak a langsuakter.


Kan nunnak hmangin Pathian hin thil sunglawi le maksak tuah a duhzet nan, kanmah lam ah Pathian ih hman thei lo dingin kan sinak, fimnak le thiamnak pawlin kan kham theu. Pathian in hman thei lo a nei lo nan, hman duh lo lawng a nei. A ram karhzainak ih a hmanmi pawl cu, anmah lam cemral awter in Pathian kha nunnak zate ah hmun a petu pawl an si. Cuvek ih nun pumhlum ih a hlan awtu pawl nunnak ah Pathian cun cangvaih ding a hngak ringring. Mi cak lo, tawntai le zianghman ti thei lo kan sinak theifiang aw in, ziangkim tithei Pathian sawm uhsi. Na sawm tam a si le na nunnak hmangin Pathian a cangvai deuhdeuh ding a si.



“Mi cak lo ti theifiangaw ih Pathian sawmtu pawl nunnak ah Pathian a cangvai”

Related Posts:

0 comments: