Pathian Thu Ih Rinum

Semtirnak 39:9; Daniel 1:8

Bible sungih Pathian mi pawl nunnak kan zoh tikah, Pathian hrangah rinumzet ih hnatuantu kan hmu ih, rinumnak tlansantu pawl khal kan hmu thei. Pathian Thu ih rinum lo, Pathian ih simmi vek ih tuahlotu pawl nunnak kan zoh tikah, an nunnak ah buainak tamzet an tuar ih, hrekkhat tla cu mawi lo zetin an nunnak a cem. Pathian Thu ih rinum pawl nunnak kan zoh asile, Pathian ih thlawsuahnak in an nunnak a thlun ringring. Pathian Thu ih rinum pawl nunnak ih langfiangmi cu, a hmun le ram, tikcu le can zoh ih rinum menmen an si lo ih, khawitawk hmun khalah Pathian Thu thlun in rimumnak thawn an nung. An thlennak ram, an umnak inn le an umnak hmun hmuahhmuah ah Pathian Thu ah rinumzetin an ding ringring.

Tulai zumtu kan nunnak ah, Pathian hrang in rinum zumtu kan mal vivo hi thin nat umza ngaingai a si. Kan inn sung, Biakinn sung, Pastor mithmuh, nu le pa mithmuh le Kawhhran hruaitu ih hmuhnak ahcun rinumzet bangin sual hrial nun kan nei nan, cutawk hmun ihsin a dang ih kan feh tik ahcun kan rinumnak hi kan kengtel nawn theu lo. Mahte ih kan um can, rualpi dang thawn kan um can ahcun duhduh ih nung, Pathian Thu ih rinum lo, Pathian thupekmi pawl thlun lo zumtu kan si ahcun, Pathian thin nattertu kan si ding. Biakinn sung kan umlai ahcun leitlun ih felbik dinhmun vekin kan um nan, a leng kan suah tikah kan tuah kelte kan tuah thei. Ziangruangah saw? Pathian cu khawihmun khalih um Pathian a si ruangah, na fehnak hmunkip ih a lo hmu ringring tu a si. Pathian Thu ih kan rinumnak hin a hmun le a tikce thlei dah hram hlah seh. Khawitawk hmun khalah Pathian Thu ih rinum ding zumtu kan si.

Kan sungah Thlarau Thianghlim cun in umpi zo ruangah, Thlarau Thianghlim ih duhmi cu kan nunnak ihsin langsuak seh. Midang thawn kan umtlang can ah maw, kanmahte ih kan umlai can ah maw, khawitawk hmun ih kan um a si khalah, zumtu kan nunnak ih a thupi zetmi cu Pathian Thu ih RINUM ringring ding hi a si. Kan nunnak in hmang duhtu Pathian hrangih kan rinum a si ahcun, kan nunnak cu thil sunglawi tuahsuaktu ah in hmang thei. Khawitawk hmun kan thlen khalah, Pathian Thu in a duhlomi, tuah in fiallomi le kan thlarau nun thawn a kalhawmi thil pawl cu hrial thiamin, rinumzetin Pathian hrang kan nunnak hlan cio uhsi. Mi ih in hmuh le hmuh lo ah thumaw ding kan si lo. Ziangkim hmutu Pathian cun tlaitluan in hmu ringring ti thei in, Pathian Thu ah rinum zuam uhsi.

“Pathian Thu ih rinumtu pawl nunnak ah Pathian ih RINUMNAK thlawsuah a lang”