Jesuh Khrih
cu leitlun ah rundamnak a tuah theh hnu ah van ah a kai ( Tirhthlah 1:9 ).
Jesuh Khrih van ih a kai hnu ah Thlarau Thianghlim cu a rung thleng ih, Jesuh
Khrih dungthluntu pawl cun Thuthangtha an sim. Zumtu thar pawl khalin an
theihmi Thuthangtha cu zum in midang hnenah an sim vivo. Cuti ih zumtu an tam
vivo tikah, anmah duhlotu pawl cun nasaten hremnak an pe. Peter le Johan cu upa
pawl hmai ah an hruai ( Tirhthlah 4: 1 22 ) ih Jesuh Khrih thuhla sim nawn lo
dingin nun an sim. Asinan, annih cun thlacamnak thawn hlan aw in an sim peh
vivo ( Tirhthlah 4:23-31 ). Zumtu an karh vivo tikah kaih le hrem an si. Cumi
sanlai ah Stephen khal lungto thawn den that a si ih ( Tirthlah 7:59 ), Herod
cun Johan ih unau Jeim cu a that ( Tirhthlah 12:2 ). Asinan zumtu an karh
sinsin.
A.D 67
hrawngah Nero cun zumtu pawl a hrem ih, amai kut in Paul le Peter pawl tla an
nunnak an rak liam. Cumi hnu khalah Khristian pawl cu mi dangdang in an hrem,
an vua, an kai ih, harsatnak tamtak tuarter in an that hai. Cutluk in Khristian
pawl ti duhdahnak, hremnak le thahnak a um nan, Khristian pawl cun Pathian hnenah thazang thar lasal in,
Pathian cu an nunnak hmangin a cangvai a si. Tufang leitlun hmun tamtak kan
zoh tikah, Khristian pawl tiduhdahnak hi tamzet theih ding a um ringring. ISIS
pawlin Khristian an that. China ram ah Khristian pawl an tuar. Iran ram ah
Khristian thawngtla tamzet an um. Africa lam ah Boko Haram pawlin nitin
deuhthaw in Khristian pawl an that rero. Khristian
pawl tiduhdahnak le thahnak a tam nan, Khristian an that tamnak ram ah
Khristian an karh sinsin. Harsatnak karlak ah Pathian cu thlacamnak thawn
an ko ih, Pathian khalin an thlacamnak a sang.
1.
Kawlram Sung.
Tuihlan ah Kawlram sung kan zoh asile, zumtu pawl hrangah hmun a cepzet.
Pathian biakkhawmnak tuah khal hmun tamtak ahcun harsatnak a um ih, tutiang harsatnak
khal hmun tamtak ah a um. Cabu suah duh khalah kan biaknak sung ih tuahmi tiin
kawlca ih ngan a tul ringring theu. Khristian si ruangah bawi tuan khal a rak
harzet. Cuvek in tikcu can kan rak hmang dah nan, Kawlram sungah Khristian hi
kumtin kan tam deuhdeuh, kan karh deuhdeuh. Harsatnak karlak ah Bible tlawngkai
suak ih Pathian hnatuantu khal tampi an rak um.
Kan ram in thatlam a pan vivo ih, milai covo tha ngah can a hung hersuah
vivo tik ahcun, Pathian Thu ih fehtu hnakin kan zalennak hmunah feh kan tamsawn
thlang ding hi phanum zetmi a si. Tuihlan ahcun tih cing te in Biakinn lam
pantu an tam nan, tih ding a um nawn lo hnu ah Biakinn pantu an mal sinsin ding
hi a phan um tuk. Harsatnak karlak ahcun Pathian kan buan ringring nan,
zalennak kan neih vivo hnu ahcun Pathian buan hnakin hmun thil dang buan nuam
kan ti sawn thlang ding hi a phan umzet a si. Biakinn pan ringring theutu nu,
pa le mino pawl an kiam vivo pang ding hi a phan umzetmi a si. Kan zalennak in Pathian thawi kan karlak in
siatbal hram hlah sehlaw.
2.
Ram Leng.
Malaysia umlai ahcun UN in in ko lo pang kei maw, misual kut ka tuar pang
kei maw, oparasi, rela le palik pawlin in kai pang kei maw ti hi kan tih zetmi
a si ( Malaysia ka hmuhtonmi umsun a si ruangah India lam ka rel tellonak a si
). Cuvek tihnak karlak ah, Biakinn pan cu kan thulh cuang lo. Hmun hla ih
hnatuan a si le Zarhte zanah hnatuannak ihsin tlungin, Zarhpi Ni ahcun Biakinn
lam kan pan theh. Harsatnak kan tuar zet nan, cui harsatnak kan tuarmi cun
Pathian in naih ter. UN kan remcannak dingah, hnatuan kan remcannak dingah,
misual le palik kut ihsin ka himnak dingah ti hi kan thlacam tambik a si. Cuti
ih nitin zantin kan thlacammi cu Pathian khalin in theihsak.
Raltlannak
hmun ihsin ramthumnak kan feh hnu ahcun, zalennak ram ah kan thleng thlang.
Nuntu khawsaknak le thil dangdang ah a semrem zet thlang. Cuvek ih zalennak ram
kan thlen hnu ahhin, zumtu mi piangthar tamzet Pathian pan nawn lo kan ummi ding
hi phan umzetmi a si. Ramthumnak thlen hnu khalah Pathian pan ringring tu khal
tampi kan um ih, Pathian hnatuan deuhdeuh tu khal mi tamtak kan um ko. Rel
duhmi cu, Kawlram ah harsazet ih kan
umlai ih Pathian kan kawh bangin, khawitawk hmun le ram kan thlen khalah
Pathian ko ringringtu ding kan si. Pathian ko tamtu Pathian in a let
ringring.
Laimi pawl
hi Kawlram ah biaknak dang kuthnuai ih um kan rak si. Biaknak dang kuthnuai ah
harsat tuar ih kan umlai ah nitin zantin Pathian kan tahhnawh ringring theu.
Kan ram in zalennak a ngah vivo ih, ziangkim a zalen vivo hnu khalah, Pathian
kan tahhnawhnak hi thlahthlam hlah uhsi. Zalennak
a umnak ah Pathian theihhngilh hi a olzetmi a si ruangah, kan zalennak in
Pathian kan pawlkomnak in siatbal sak hlah seh.
“Kan harsat can le kan lungawi can, kan tah can le kan hnih can, kan tlaksiat
can le kan hlawhtlin can hmuahhmuah ah, kan thumawknak cu Pathian lawnglawng si
hram seh”
0 comments: