Kolose 2:3
Leitlun dan ih mifim kan timi pawl khi, mi
ih theihthiam lomi theitu, mi ih tuah theilomi tuah thei, mi ih ruat thiam lomi
ruat thiam ih, mi ih an zum ban lo tiang khuakhang thiam pawl hi an si. Zirnak
lam ih an thiamsang tikah, mi in mifim ah zoh in, hmun thatha khal co ngahtu an
si. Leitlun zohnak ahcun midang ih tluk ban lo ih an tuah thei, an ruah thei ih
an tuan thei ruangah mifim tiin kan ko theu. Leitlun thuanthu kan zoh tik
khalah, mifim tamzet pawl ih thuanthu kan hmu ding. An fimnak ruangah mi ih
tlun ah an um. Leitlun zoh dan ahcun mifim le mi aa an um. Mifim cun a hmailam
hrang ding a ruat ih, sum le pai tla tamzet nei dingin a zuam. Hmailam hrang a
ruat nan, a hmailam ah ziang a thlen ding ti a theihfiang lo ruangah mifim
ngaingai tiin rel theihmi a si lo.
Zumtu pawl kan nunnak ahcun, Jesuh Khrih
thisen ih leimi kan si theh ruangah Pathian hmai ah dinhmun bangaw nei kan si.
Lei tisa dan in ziangvek dinhmun neitu kan si khalah, Pathian Fapa Jesuh Khrih
thisen sung ah dinhmun bangaw nei kan si. Leitlun hmuh dan ahcun fimnak,
theihnak le thiamhleicenak kan nei lo tla a si thei men. Jesuh Khrih neitu kan
si hnu ahcun, leitlun mi ih theihthiam banlomi fimnak neitu kan si. Amen.
Thlaraulam danin Pathian thawn pawlkomnak kan neih tikah, nun lungawinak, nun
hahdamnak, nun diriamnak le nun hnangamnak pawl kan co ngah a si. Cupawl cu
leitlun mifim pawl ih an neih ban lomi, Jesuh Khrih ruangih kan congahmi pawl
an si. Leiltun ih a hmuh banlomi vanlam fimnak cu Jesuh Khrih pek in kan um.
Amen.
Leitlun dan ih mifim le mithiam pawl cun,
Pathian ih a sersiammi leitlun thilri pawl an zir rero. Zumtu pawl kan
vanthatnak le Jesuh Khrih ruangih mifim kan sinak cu, lei le van tuahtu Pathian
ih fimnak le Pathian Thu pawl kan theihnak hi a si. Leitlunmi pawl ih
mithmuhnak ahcun kan khawmnak, Pathian ram hrang kan peknak le kan tuannak pawl
hi atthlakza men a si. Asinan, Jesuh Khrih sungih in pekmi fimnak ruang ahcun,
kan hmailam ih thil thleng dingmi pawl kan theifiang / hmufiang ih, Pathian ram
hrang kan tuannak le pekmi pawl kan hmusal ding ti ruahsannak nung thawn kan
nung sawn. Leitlun mi hrangah Pathian Thu ih feh ih atthlakza a si nan, Jesuh
Khrih ruang ih kan ngahmi fimnak sawn cun kumkhua ih a daihmi ro khawltu ah in
tuah sawn. Jesuh Khrih ruang ahcun, kan hmailam thu hmufiangtu Mifim ah kan
cang a si.
“Jesuh Khrih ruangah
Pathian in kan hmailam ih a retmi pawl hmufiangtu Mifim ah kan cang a si”
0 comments: