Efesa 4:27
Pathian Thu
ih kan hmuh bangin, mi pakhat in Jesuh Khrih a zum ngah hnu ahcun Thlarau
Thianghlim a sungah a um ( Efesa 1:13 ) ih, tuihlan ih a rak neihmi tisa duhnak
khal a um ( Galati 5:16 – 17 ). Kan sungih a ummi mizia pahnih lakah, tisa
caknak hmangin Satan cun zumtu pawl bum dingin a bawh ringring. Satan thawn
pehparaw in kan tuanvo le tuah ding in simmi a um ve. Satan cu leitlun uktu
thlarau sia a si ruangah, Pathian Thu hawn do dingin in fial ( Efesa 6:10 – 18 ).
Satan cu do hrimhrim dingih fialmi kan si ( James 4:7 ). Satan cu a fimzetmi a
si ruangah, Satan lakah ralringzet ih um dingin fialmi kan si ( 1 Peter 5:8 ).
Mi piangthar nunnak ah piangthar sal lo dingin Satan in hna a tuan thei lo. Pathian
Thu ihsin pial ih, Pathian Thu vek ih nung lo ding cun mi a thlem ringring.
Satan cu a
fimzetmi a si ruangah, zumtu pawl ziangtin ka thlem ding timi cantha zoh in mi
a bawh ringring. Nitin kan nunnak ah, Satan cun Pathian Thu ihsin pial ih,
Pathian Thu vek ih nung cetco lo dingin kan kiangkap ihsin in thlem ringring ti
hi kan theih a thupi ngaingai. Mi
piangthar kan si hlan ih kan duhmi, kan uarzawng, kan tuah theumi le kan feh
theunak pawl hmangin Satan cun in thlem tum ringring. Satan ih fimnak hi
zumtu pawl ih kan theihthiam a si le, Satan ih thlemnak sungah kan tlu lo ding.
Pathian Thu ih in simmi vek ih nitin kan nunnak kan hmang a si ahcun, Satan in
kan nunnak ah can tha a ngah lo ding ih, kan thlarau nun a pitling vivo ding.
Kan duhduh in kan um, Pathian Thu ruat cuca lo ih kan tlang mualmo men a si
ahcun, Satan can tha kan pe thawn a bangaw. Cuvek can te cu a bawh ih, thil tha
lo tuah ding kan hmai ah a thleng theu a si. Ralringten nung thiam uhsi.
Can remcang
hawl ringring tu Satan in kan nunnak ih can tha a hmuhlonak ding ahcun, kanmah
khal Pathian Thu buaipi ih kan can kan hman ringring a thupi. Joshua hnenah
Pathian cun A Thu cu a sun a zan ih siar dingin a cah ta ( Joshua 1:8 ).
Hnatuan tul kan si ruangah tlaitluanin Bible kan siar man lo ding. Asinan,
Pathian Thu kan siar ciami, kan thinlung ih kan cinkenmi pawl cu khawitawk kan
thlen khalah kan ruat thei. Thinlung ih
kan theihmi Pathian Thu cu ruatin, hla ih an phuahmi Pathian Thu cu ngai tamin,
khawitawk hmun kan feh khalah thinlung sung ihsin thlacamnak thawn kan can kan
hmang a si ahcun, Satan cu can tha kan pe lamlam lo ding. Pathian Thu le
hla pawlin na nunnak a lo luah tam poh le, Satan in na nunnak ah hnatuannak
ding hmun a co lo ding ih, Jesuh Khrih dungthluntu tha si in kan thlarau nun a
thanglian vivo ding.
“Pathian Thu ih buai tamtui’ nunnak ah Satan in can a co dah lo”
0 comments: