Ngaidamnak Maksak





( Meisa thawn an inn le amah nawktu ISIS pawl ngaidam theitu Khristian Nunau kum 12 mi )


Iraq ramsung ih Mosul khua cu ISIS pawl cun anmai kuthnuai ah an ret bet. ISIS ral an hran pek ihsin Mosul khua hi anmah in an rak uk thei zo. Mosul khua ahhin Khristian an um ve hnuaihni nan, ISIS pawl kuthnuai ih um an si ruangah an hnenah siah ( tax ) an pe. ISIS pawl hin Khristian nunau pawl hi an duhduh ih an tuah dingah an kai ih, hrekkhat cu sal vek in zuarmi khal an um. Ralram an feh ih an tlun tikah, Khristian nunau pawl hi an bang rehnak vek fangah an hmang men. An duhduh tik ah an duhduh ih tuah dingin nunau hi an lei.


Mosul khawsung ih um Khristian insang pakhat khal ISIS pawl hnen ih siah petu an si. Tumkhat cu an siah pek a tlai deuh ruangah ISIS pawl cun Pi Jacqueline Isaac tei inn ahcun ISIS pawl cu an va ih, siah pe dingin an sim ih a pek lo a si le an inn meisa ih nawkkang dingin an hro. Pi Jacqueline Isaac cun a fanu kum 12 mi cu a khawlhawk rero lai ruangah malte hngak ih pe dingin a sim nan ISIS pawl cun an duh lo ih an inn cu meisa in an nawkkang. Midang cu inn lengah an um man nan, khawlhaw rero lai kum 12 mi te cu a suak man lo. Meisa kang cun kum 12 mi cu a kang ih, a taksa a kangsiat theh ruangah sizung ah fehpi a si nan a nunnak in a daih nawn lo. A Nu cun a fanu cu a cawi ih, a fanu te cun, “Ka Nu, ngaidam hai aw” tiin a tongkam netabik cu a tong.


Pathian cu duhdawtnak a si ih, milai pawl hi kan sual bik lai can ah in duhdawt. Misual bik duhdawttu Pathian zumtu neitu Khristian pawl hin, midang ngaidamnak hi kan nunnak ihsin kan rahsuak ter dingmi a si. Minung kan sinak thaw cun midang ngaidam hi a harsa zetmi a si theu nan, mi piangthar kan si veten “Sersiam thar ( 2 Korin 5:17 )” kan si zo ruangah Khrih Jesuh ih nun mawi kan nunnak ih langter in midang ngaidamtu ding kan si. Jesuh Khrih zumtu pawl nunnak ih langsuak dingmi cu, “Pakhat le pakhat ngaidamawknak ( Efesa 4:32, Colose 3:13 )” hi a si.


“Midang sualnak na ngaidamnak cun na nunnak ah lungawinak a thlen ih, midang pawlin Pathian hmin sunlawinak an hmu”





Hminsin : Daily Mail ih nganmi, “Christian girl burned alive by ISIS told her mother to forgive them as she lay dying in her arms” timi a tawizawng ih ngansalmi a si.

Related Posts:

0 comments: