Matthai 3:8
Baptisma petu Johan cun farasi le sadusi
pawl tihnimnak la ding ih an rat lai ah, an hnenah thusimnak a nei. Farasi le
sadusi pawl cun Abraham tefa an sinak le daan an thlunnak cu rinsan in vankai
an tum. Cuvek ih an tumnak cu a diklomi a si ti kha Johan cun a sim hai. Cumi
rualin Johan cun an hnen ahcun, misual an sinak ihsin siraw dingin a sim hnu
ah, sirawknak cu a rah ih hmuh a si thu khal a sim hngal a si. Piantharnak hrangah sualsir a si lo ih, mi
piangthar cun a sual a sir hngal sawn a si. Piangthar ti si ih tuahkel tuah
ringring cu a diklomi a si. Mi pakhat in Jesuh Khrih a neih hnu ahcun, a sung
ih um le nung Jesuh Khrih ih duhdan in ke a kar thlang ruangah, a tuah dahmi
sualnak cu siraw tahratin thil tha tuahnak cu a nunnak ah a langsuak a si.
David cu Pathian hmai ah a sual ih, mi dang
nupi a ihpi tikah a parah Pathian a thinheng ngaingai. Pathian hmai ah thil a
tisual ti a theih veten a sual a sir ih, a damsungah midang nupi a sualpi timi
a um nawn lo. David ih sualsirnak cu a
rah in a lang a si. Jonah cu Pathian ih a fiallonak hmunah a feh tikah a
parah Pathian a thinheng ih ngapi pumsung tiang a thleng. Jonah cun Pathian
hnenah sualsir ih thla a cam tikah Pathian in a ngaidam ih, a sualsirnak cu Pathian ih a fialnak ih
fehnak in a siraw ngaingai ti a langter. Zakai cun Jesuh Khrih a hmuh ngah
hnu ahcun a sual a sir ih, tuihlan ih midang tangka tampi a laksakmi a peksal
ih tlunah a tuah dahmi sualnak cu a tuah nawn lo. A sualsirnak cu tuahnak in a langter a si.
Zumtu pawl kan nunnak ah, sualsirnak
ngaingai kan nei a si ahcun kan tuahmi kan tuah nawn lo. Kan tuah dahmi cu dung
kan tun ih, kan tuah dahlomi thil tha sawn kha kan tuah thlang. Zianruangah ka
piangthar ti cing ih mi a sual ringring ti asile, a pianthar ngaingai lo
ruangah a si. Jesuh Khrih neitu an sual
ringring nawn lo. An sual pang a si hmanah sualsirnak thawn Pathian hnenah
an kirsal ih, Pathian ih ngaidamnak an congah hnu ahcun an tuah dahmi sual an
tuah nawn lo a si. Sual ka sir ti cingih kan tuahkel kan tuah a si ahcun, a
diklomi sualsirnak a si. Pathian fate kan si hnu ahcun kan sungah thiktu Thiang
Thlarau kan nei ih, sual kan tuah veten ka tuahmi a dik lo ti theihnak khal kan
nei hngal. A dik lo ti kan theih veten Pathian hnen ngaidamnak kan dil ih, kan
sual kan sir a si ahcun Pathian ngaidamnak khal kan co hngal a si.
“Sualsirnak dik cu tuah
dahmi sual tuah nawn lo hi a si”
0 comments: