Rundamnak Maksak

Hebru 2:3

Pathian in milai pawl in rundamnak hi ruah rero tikah a thuk tukmi a si. Mi ding pakhat hrang ih midang thih cu a har lo ding nan, misual hrangih midang thih timi cu a maksak zetmi a si ( Rom. 5:7 – 9 ). Khristian biaknak ih danglamnak cu, “Sersiamtu Pathian cun sersiammi pawl hrangah a nunnak a hlan” timi hi a si. Pathian in milai pawl hrang rundamnak in tuahsakmi hi, leitlun tong phunkip khalin simfiang tum khal sehla simfiang thei lomi duhdawtnak a si.

1. RUNDAMNAK TUAHTU PATHIAN.

Pathian in Adam a rak sersiam lai ah a hnarah thaw a thaw ih, leidip ihsin tuahmi milai cu minung ah a cang. Cui minung cun amah bawmtu ih tuahmi Eve thawn Pathian thu an lun lo ruangah Pathian hmai ah misual an si. Pathian hmai ah milai cu misual an si zo nan, Pathian cun A sersiammi milai pawl cu a duhdawt lai thotho. Amah thawn kumkhua ih umtlang, lengtlang ih pawlkomaw sal dingin Pathian cun milai hrang rundamnak tuah hi a tumtahmi a si ( 1 Peter 1:10 – 12 ).

A tluse zomi milai pawl rundamnak hrang tuahtu hi Pathian si lo sehla rundamnak hi, ‘A maksak mi rundamnak’ tiin kan ko thei lo ding. Pathian cun A Fapa Jesuh Khrih ah Rundamnak Maksak tuah dingin a rak khawkhanmi a si ( Efesa 1:3-8 ). Kumkhua hell meipi ih thi ding nunnak vanram ih in hruai thlengtu, rundamnak maksak in tuahsaktu hi Pathian lawnglawng a si. Rundamnak kan conak khal kanmah lam ah si lo in, Jesuh Khrih thisen ruangih mifel, mi thianghlim le mi ding, Pathian thinlung sung ih kan sinak sawn kha a si ( 1 Korin 1:30 ).

Rundamnak Maksak tuahtu Pathian ih thinlung hi vun ruat ve hman. Mi tha zohman kan um lo, A hmai ahcun zianghman thathnemnak kan nei lo, thianghlim lo le tenum kan si. Pathian ih ral kan rak si. Cuvek dinhmun ih a dingmi milai kan si ko nain, Pathian cun duhdawtnak Pathian asinak kha Jesuh Khrih ah langsuak terin, kan hrangah kumkhaw nunnak in tuahsak a si. Pathian in kan hrang a rak remruat ciami cu Jesuh Khrih ih suahnak, thihnak, phumnak le thawhsalnak cun kumkhaw hrang rundamnak cu in tuahsak zo a si ( Titus 1:2-3 ). Zianghman ih santlainak nei lo milai hrang Pathian in rundamnak a tuahmi hi, tongkam hmuahhmuah lak ih manhla bik “Rundamnak Maksak” a si. Amen.

“Rundamnak Maksak timi cu - Sersiamtu Pathian cun sersiammi pawl hrangah a nunnak a hlan”