Isaiah 6:1-8
Ni thla siarnak ah 2016 a cem zo ih, 2017
sungah kan lut rero zo. Mikip in kum thar ah thlacamnak ih hlan hleicemi,
Pathian hnen ih dilmi kan nei ṭheu. 2017 ah Pathian lam ih ke kar vivo nak ding
hrangah tiin Isaiah ih “HMUHNAK PATHUM”
hi ka thlacamnak a si ve.
1.
ISAIAH CUN PATHIAN IH SINAK A HMU ( 1-4 )
Pathian cu Isaiah hnenah a lang ih, can
menmen ah lang lo in siangpahrang Uzziah a thih kum kherkher ah langnak a hmu.
Isaiah cu Uzziah in siangpahrang a ṭuan lai ih propet ṭuantu a si. Ziangruangah
Pathian cu Uzziah a thih kum kherkher ah Isaiah hnenah a lang? Pathian in
Isaiah hnenah asinak langter a duh ruangah a si. Isaiah hnenih lang Pathian ih
sinak le Uzziah ih sinak khaikhim tikah, Pathian ih sinak lei siangpahrang ih
tluk ban lomi a si.
a. Lei siangpahrang ( Uzziah )cu a thi ih, van siangpahrang (
Pathian )cu a thi thei lomi a si.
b. Lei siangpahrang ( Uzziah ) ih thuneihnak cu a cem nan, van
siangpahrang ( Pathian ) ih thuneihnak a
cem dah lo.
c. Lei siangpahrang ( Uzziah ) ih thiltitheinak cun cemni a nei
nan, van siangpahrang ( Pathain ) ih thiltitheinak cu a hmun.
d. Lei siangpahrang ( Uzziah ) ih huham le cahnak cu a cemral thei
ih, van siangpahrang ( Pathian ) ih huham
le cahnak cu zohman ih neih theih lo a si.
e. Lei siangpahrang ( Uzziah ) cu upat tlak ngaingai a si lo ih, van
siangpahrang ( Pathian ) lawng upat tlak
umsun a si.
f. Lei siangpahrang ( Uzziah ) cu sualnak tuahtu misual a si ih, van siangpahrang ( Pathian ) cu a thianghlimmi Pathian a si.
g. Lei siangpahrang ( Uzziah ) cu sunlawih tlak ngaingai a si lo ih,
van siangpahrang ( Pathian ) lawng sunlawihtlak
a si.
Pathian ih sinak pawl hi lei siangpahrang ih
sinak thawn tahṭhim tlak zianghman an um lo. Biaktlak, rentlak, sunlawihtlak,
thangṭhattlak le biaktlak umsun hi Pathian lawnglawng a si. Pathian ih sinak
hmufiangtu pawl in Pathian hnen ihsin an pial thei nawn lo.
“Bawipa, 2017 ah na sinak pawl in theifiangter in in hmufiang ter
sinsin aw”
2.
ISAIAH IN AMAI’ SINAK A HMUFIANG ( 5-7 ).
Isaiah in Pathian Pathian ih sinak pawl a
hmuh tikah, amah le mah a zohaw ih, Pathian hmai ah misual asinak theifiang in,
“Ka cem a si” a ti. Pathian Thu
hmangin Pathian ih sinak pawl theifiang tu pawl in, midang nun an zoh dah lo.
Pathian hmai ih an sinak an theifiang aw ih, Pathian lawnglawng hi rinsantlak
asinak khal an sarsuak deuhdeuh a si. Piangthar hrih lo in piantharnak a
ngahnak ding ahcun, “Misual” a sinak a theihfiangawk a ṭul hmaisa ih, cui
theihfiang awknak cun “Rundamtu A Ṭul” ti a fiang sinsin ih, Thlarau Thianghlim
theihternak thawn rundamnak cotu a si thei.
Zumtu pawl kan nunnak ah, ziangruangah mah
le Pathian karlak buai lo in midang nun, midang tidan le midang ih nunzia pawl
lawnglawng kan buai ṭheu ti asile, Pathian Thu kan rak hmuhfiang lo ruangah a si
ṭheu. Pathian ih sinak pawl theifiang tu pawl cun :
a. Abraham – “Maw Bawipa, kei cu leidip
le vutcam lawng ka si ih, na hnenah sim theinak zianghman ka nei lo (
Semtirnak 18:27 )”.
b. Jacob – “Kei na salpa hnenah na thlentermi na zangfahnak le rinsantlak
na sinak hi a cotu dingah malte hman ka
tlak lo ( Semtirnak 32:10 )”.
c. David – “Maw Bawipa Pathian, kei hi zianghman ka si lo. Ka hrangah thil na tuahmi hmuahhmuah co dingah ka tlak hrimhrim lo. Ka innsang khal an
tlak lo ( 2 Sam. 7:18 )”.
d. Peter – “Bawipa I fehsan aw, ziangahtile kei cu misual ka si (Luke 5:8 )”.
Pathian ih sinak theifiangtu cun Pathian
hmaiah zianghman an si lo ti an theifiangaw ih, Bawipa rinsannak ah tlanlut in
an nun cu Pathian ih hmantlak ah Pathian in a tuahsawn a si. Pathian hmai ah
zianghman na si lo ti theifiang ding in, Pathian ih sinak fiang sinsin aw.
“Bawipa, 2017 ah, na tleunak hnuai ah midang nun ah buai lo in,
keimah le keimah zo ka si ti in theiter in in hmufiang ter sinsin aw”
3.
ISAIAH CUN PATHIAN IH TUAHTER A DUHMI A HMUFIANG ( 8 ).
Isaiah cun Pathian ih sinak a hmufiang ih,
Pathian hmai ah zianghman lo asinak a theihfiang hnu ah Pathian ih
ti-thianhlimnak a co. Pathian in a ti-thianhlim veten Isaiah hnenah tuahter a
duhmi a sim hngal. Mi piangthar kan si veten Pathian in kan nunnak ah tuahter
in duhmi a um hngal. Leitlun harsantnak
lakah Pathian in zumtu nang le kei in retnak hi, a aiawh ih PALAI ih fehtu
dingah kan si ( 2 Korin 5:21 ). Pathian ih sersiamnak ah kan tel ban lo
nan, rundamnak thuthangṭha simtu dingah cun, Pathian ih hnaṭuanpitu kan si ( 2 Korin 6:1-2 ).
Pathian in Isaiah a kawh veten Isaiah in
thusuhnak dang a tuah man lo, Bawipai’ hrang a man hngal thu a ṭongsuak hngal.
Zumtu kan nunnak hi Pathian Fapa Jesuh Khrih thisen ih lei zomi, van nunnak
neitu kan si zo ruangah, kan man le man lo, kan thiam lo thiam lo, kan fim le
fim lo, kan zir le zir lo lam si lo in, Pathian in in hmang duh hrimhrim a si. Pathian in leitlun milai zate hi a hmang
thei nan, Amai’ hrang “Ka man, ka ṭuan ding” a titu pawl hi a hmang hleice
cuang a si. Pathian in nang le kei khal, leitlun mi in rundamnak an ngahnak
ding hrangah lamzin pakhat tal ahcun in ṭul ve. Bawipai’ hrangah na man ve maw?
“Bawipa, 2017 ah Isaiah in tuahter na duhmi a hmuhfiang ih a man
hngal bangin, tuahter i duhmi theifiang ih na hrang feh sinsin dingin ka man ve
a si”
Thunetnak : Isaiah
ih a hmuhmnak pathum pawl hi zumtu pawl ih kan hmuh ve dingah a thupi zetmi a
si. Tuini ah nang le kei in Pathian, Bawipa, Ka Pa ti ih kan kawhmi ih sinak hi
theifiang sinsin uhsi. Kan theihfiang tam poh le biaktlak, rentlak le
sunlawihtlak Pathian asinak kan theifiang ding. Cun, Pathian ih sinak tleunak
hnuai ahcun kan dinhmun kan hmufiang aw ding ih, Pathian lawng rinsantlak
asinak khal kan hmufiang ding. Pathian in tuahter in duhmi cu leitlun ah amai’
hrang PALAI ih fehtu ding ah a si. Pathian hrang a man tu pawl Pathian
in a hmang.
0 comments: