Luke 19:10
Pathian in leitlun semhlan ihsin Jesuh Khrih
ah milai zate hrang a rak remruahmi cu, mi zakip in rundamnak an co ih kumkhaw
nunnak an neihnak dingah a si ( Efesa 1:3-12 ). Pathian ih tikcu tinmi can a
kim tikah, Fapa Jesuh Khrih cu leitlun milai zate tlen dingah leitlun ah a ra
ih, milai zate hrang kumkhaw daihin rundamnak in tuahsak ( Galati 4:4-6; Hebru
9:12 ). Leitlun milai zate nunnak ih Pathian ih tumtahmi tumbik le sangbik cu, milai zate ih rundamnak ngah ding hi a si
( 1 Tim. 1:15 ) ih, milai zate in Pathian hmai ihsin pial kan si ruangah
mihlo si in, kanmah hawl ding hi Jesui’ tumtahmi sangbik a si ( Luke 19:10 ).
Leitlun kan zoh tikah, Pathian ih tumtahmi hmaisabik
hi kan ṭhelh pang maw aw tiih khawruahnak hi a suak ṭheu. Leitlun ah kan um ih,
kan taksa ṭulmi hrang ei le in ding sumpai cu kan hawl a ṭul ko. Asinan,
leitlun ah sankhat lawng kan nung ding ih, thih hnu ah kumkhaw hmun pahnih
fehnak ding a um. Leitlun kan nun sung
ih kan hrang thupibik cu rundamnak kan ngah ding hi a si. Satan hi a fim
tuk ruangah Pathian ih in tuahsak zomi rundamnak hi theifiang lo le theithiam
lo dingin lamzin dangdang in in bum tum rero ( 2 Korin 4:4 ). Cumi cu Satan ih
hnaṭuanmi tumbik pakhat a si. Laimi huap ih kan zoh tik khalah, rundamnak thu
hi ziangih siar lo an tam vivo ding hi a phan um zet ih, Pathian ih tumtahmi ṭhelhnak
lamzin a si.
Zumtu umkhawm Kawhhran khalah, tulai ah
rundamnak thuthangṭha simmi theih ding hi a mal vivo. A poi zetmi a si. Paul
in, “Thudik thlun lo in mai duhmi an
thlun ding ih, anmai duhmi reltu saya lawng an sawm ding. Thudik hnakin
thuanthu menmen an ngai duh ding ( 2 Tim. 4:3-4 )” tiin Timote hnen ih a
simmi tla a kim rero thlang. Paul ih simmi kimtertu si ding hi a phan um mi a
si. Pathian ih tumtahmi sangbik cu, mi zate rundam ih an um ding hi a si
ruangah, zumtu pawl ih kan ṭuanvo sangbik cu, mi zate in rundamnak an theih
ding hi a si ( Zum ter theinak kan nei lo ih, sim ding lawng kan ṭuanvo a si ).
Pathian Fapa leitlun a ratsan bik hi, lamzin
dangdang ih ṭhansoh si lo in, rundamnak thuthangṭha a karhzai ding hi a si sawn.
Rundamnak cotu kan tam a si le, Pathian hnaṭuannak khalah thazang suahtlang in ṭuan
a theih vivo sawn, kan lungawi vivo ih, Pathian Thu khal a karhzai vivo a si.
Tufang leitlun mipi Pathian Thu ih feh dan
zohsal tikah, Pathian ih tumtahmi hmaisabik ṭhelh in, a pahnihnak feh tumtu
thawn a bangrep maw aw timi hi ruahnak tumzet ummi cu a si. Mi pitling si ding
cun nui’ pumsung ihsin suah ta a ṭul vekin, Khristian nun pitling nei ding
ahcun thlaraulam ih hrinsalnak / piantharnak neih hmaisa a ṭul. Piantharnak nei hmaisa lo in karbak
pahnihnak ih feh a ngah lo. Feh tum rero khal sehla rei a daih lo ih, lam
hrek thlen hlan ah mah kelte ah a cang ṭheu. Curuangah, a hleice in Laimi zumtu
pawlin, kan kiangkap ih rundamnak co
hrih lo pawl rundamnak an ngah ding hi pakhatnak ah ret uhsi. Cumi hnu ah
karbak pahnihnak feh ding sawn a si. Karbak pakhatnak a simi Rundamnak congah
hnu lawnglawng ih Khristian nun ah pitling in, Pathian ih duhdan lamzin khalah
feh a theihmi sawn a rak si.
“Pathian in leitlun ih tumtahnak
sangbik a neihmi cu, mi zate in Jesuh Khrih ih a tuahsak zomi rundamnak thu an
thei ih, an zum ih kumkhaw nunnak an neih ding hi a si”
0 comments: